Радева била примена на невролошкиот оддел во болницата „Свети Иван Рилски“ во понеделникот попладне откако се пожалила дека 12 часа има силна и непрекината главоболка.
Првата дама на Бугарија, Десислава Радева, во тешка состојба е примена во софиската болница „Свети Иван Рилски“. Како што јавуваат тамошните медиуми, повикувајќи се на изјави од лекари во болницата, нејзината состојба е сериозна, но засега стабилна. Официјални информации нема ниту од болницата ниту од кабинетот на претседателот на Бугарија, Румен Радев.
Дел од медиумите известуваат дека ѝ биле направени сите испитувања за да се превенира евентуално дополнително влошување на состојбата, но не ја исклучуваат можноста врз сопругата на бугарскиот претседател во текот на денешниот ден да биде извршена и посериозна интервенција.
Радева била примена на невролошкиот оддел во болницата „Свети Иван Рилски“ во понеделникот попладне откако се пожалила дека 12 часа има силна и непрекината главоболка. Испитувањата и ангиографијата, како што пишуваат бугарските медиуми, покажале дека таа има три аневризми во мозокот.
Во текот на вчерашниот ден преку интервенција врз артериите била направена и проверка на состојбата на аневризмите.
„Таа е за операција, но специјалистите од болницата, кои се на светско ниво за ваков тип интервенции, се обидуваат ако е можно да го решат проблемот. Но, ако не успеат во тоа, тогаш неминовна ќе биде отворена операција“,
изјавиле извори од болницата за бугарските медиуми.
Аневризмите, според нив, се последица од прележаниот ковид.
Десислава Радева била позитивна на коронавирус во средината на февруари. Тогаш и таа и нејзиниот сопруг, бугарскиот претседател Румен Радев, поминале 10 дена во изолација и ги одложиле сите предвидени активности во тој период. Не е познато колку тешки биле симптомите и како таа се справила со болеста, но оттогаш, како што тврдат бугарските медиуми, таа воопшто не се има појавено во јавноста.