Ова е втора средба на Заев со претставници на албанската опозиција – АА и Алтернатива
Во Собранието денеска претпладне почна средбата меѓу премиерот Зоран Заев и претседателите на опозициските албански политички партии Алијанса за Албанците и Алтернатива, Зијадин Села и Африм Гаши.
Ова е втора средба на Заев со претставници на албанската опозиција – АА и Алтернатива. На средбата, покрај Заев, присуствува и министерот за земјоделство, шумарство и водостопанство Арјанит Хоџа.
На средбата треба да се разговара за измените за Законот за државјанство и решавање на проблемот со немањето државјанство на одреден број граѓани, како и за одблокирање на работата на Собранието.
Решавањето на прашањето на државјанство би придонело и во деблокирање на Собранието од илјадници амандмани што ги достави коалицијата Алијанса за Албанците и Алтернатива.
Села вчера во интервју за Радио слободна Европа – пред денешниот нов обид за договор рече дека ќе блокираат сè што можат да блокираат сè додека нивниот закон е блокиран со амандмани во матичната комисија.
Пред две недели премиерот Заев заедно со неколкумина министри се сретна со координаторот на пратеничката група на Алијанса за Албанците и Алтернатива, Скендер Реџепи, и со неговата заменичка во врска со законот за државјанство, кој беше причина за блокада на дваесетина закони во парламентот. Тогаш и Заев и Реџепи рекоа дека има оптимизам за решавање на оваа прашање.
Законот за државјанство што го предлага Алијанса/Алтернатива е блокиран со 547 амандмани на Левица, според последните информации од Собранието, иако со решенијата што ги предлага опозициската коалиција не се согласуваат ниту СДСМ и ВМРО-ДПМНЕ, кои сметаат дека треба да се реши ова прашање, ама на поинаков начин.