Според Обвинителството, обвинетите лица и други засега непознати учесници на протестите се обиделе да го пробијат полицискиот кордон фрлајќи камења, метални шипки и други предмети, при што со тешки телесни повреди се здобил еден новинар, а повредени биле и 11 полицајци
Основното јавно обвинителство Скопје денеска до Основниот кривичен суд Скопје поднесе обвинителен предлог против шестемина учесници на протестите во врска со пресудата за предметот „Монструм“, за кои претходно беше поведена постапка и им беше определена мерка притвор. Сите се обвинети за кривично дело – учество во толпа што ќе изврши кривично дело согласно член 385 став 2 во врска со став 1 од Кривичниот законик.
Заедно со обвинителниот предлог, скопското обвинителство предложи и да им биде продолжена притворската мерка со цел нивно обезбедување во текот на кривичната постапка.
За истото кривично дело поднесен е обвинителен предлог и против уште едно лице, за кое Обвинителството на судот денеска му предложи да определи мерка притвор, поради опасност од бегство и можност да го повтори делото.
Според Обвинителството, обвинетите лица и други засега непознати учесници на протестите се обиделе да го пробијат полицискиот кордон фрлајќи камења, метални шипки и други предмети, при што со тешки телесни повреди се здобил еден новинар, а повредени биле и 11 полицајци.
„Имено, Основното јавно обвинителство Скопје ги гони седумтемина обвинети, бидејќи на 26 февруари, како учесници на јавниот собир на граѓани во Скопје – протест за пресудата во предметот ‘Монструм’, биле дел од толпата која со заедничко дејствување сторила насилства кон полициски службеници и други присутни лица. Имено, обвинетите и други засега непознати лица започнале заеднички да дејствуваат кон полициските службеници, фрлајќи камења, бекатон-плочки, метални шипки и други предмети, во обид да го пробијат полицискиот кордон. Како резултат на ова, со тешки телесни повреди се здобил новинар присутен на местото на настанот, а повредени биле и 11 полициски службеници,“
велат од Обвинителството.
Инаку, протестите ги најавија роднините на првостепено осудените лица за случајот „Монструм“, кој се однесува на петкратното убиство кај Смилковско Езеро на 12 април 2012 година, а кои се жалат дека се невини и осудени без докази.
Со првостепената пресуда што Основниот кривичен суд во Скопје ја изрече во вторникот (23 февруари) на доживотен затвор за тероризам беа осудени Алил Демири, Африм и Агим Исмаиловиќ, Хаки Азири на 9, а Фејзи Азири на 15 години за помагање. Сами Љута доби ослободителна пресуда откако Обвинителството се откажа од негово гонење поради немање докази за вмешаност во петкратното убиство.