Приоритет на реформски план е донесување нов закон за јавно обвинителство и очекуваме тој да биде донесен од овој парламент, пред изборите во април, изјави еврокомесарот за проширување
Еврокомесарот за соседство и проширување Оливер Вархеји вели дека Европската комисија останува на оценката дека Северна Македонија и Албанија се подготвени за почеток на пристапните преговори. На заедничката прес-конференција, заедно со премиерот Оливер Спасовски денеска во Скопје, Вархеји рече дека очекува одлуката од земјите членки да се донесе пред Самитот ЕУ – Западен Балкан предвиден за мај во Загреб.
Приоритет на реформски план е донесување нов закон за јавно обвинителство и очекуваме тој да биде донесен од овој парламент, пред изборите во април, изјави Вархеји. Комесарот го спомена донесувањето на законот за јавно обвинителство и во контекст на мини-извештајот што ЕК планира да го објави за Северна Македонија и за Албанија во февруари.
Еврокомесарот рече дека клучна останува и имплементацијата на Договорот од Преспа со Грција и на Договорот за добрососедство со Бугарија, без разлика на тоа кој ќе ја води идната влада во Северна Македонија.