Функционери во СДСМ тврдат дека поранешниот и долгогодишен лидер, сепак, го обновил членството, иако најави дека го замрзнува, но нема информации дали се пријавил и за гласање на 21 март
Парцијален избор само на претседател на СДСМ на директни избори повеќе ќе придонесе за султанизација отколку за демократизација во партијата, вели поранешниот партиски секретар Горан Минчев
Премиерот Зоран Заев е пред реизбор за претседател на владејачкиот СДСМ, со оглед на тоа што нема противкандидат на првите непосредни избори за лидер на партијата, откако во четвртокот заврши постапката за ажурирање на членството.
На 21 март, сите оние кои во изминатите неколку седмици го обновиле членството или сега се зачлениле во СДСМ ќе може да учествуваат на внатрепартиските избори. Според последните информации, СДСМ сега брои над 80 илјади членови, од кои еден дел, како што наведува, се нови и млади луѓе.
За гласање на внатрепартиските избори следниот месец, пак се пријавени околу 70 илјади. Сепак, останува дилема дали меѓу оние кои го обновиле членството е поранешниот и долгогодишен партиски лидер Бранко Црвенковски, претходникот на Зоран Заев на чело на СДСМ, долгогодишен премиер во неколку мандати и трет претседател на државата.
Од кабинетот на Црвенковски, како поранешен шеф на државата, „360 степени“ се обиде да добие одговор дали тој го ажурирал членството во СДСМ, со оглед на тоа што неодамна, реагирајќи на интервјуто на Заев за БГНЕС, посветено на односите Скопје – Софија, најави дека го замрзнува членството во партијата во чие основање учествуваше. Но, од неговиот кабинет ни одговорија дека Црвенковски нема што да каже на таа тема.
Функционери во СДСМ, пак, тврдат дека поранешниот и долгогодишен лидер, сепак, го обновил членството, иако најави дека го замрзнува, но нема информации дали се пријавил и за гласање на 21 март.
.
Затоа, пак дел поранешни функционери на СДСМ, во времето на Црвенковски, кои сега не се на партиски позиции, потврдуваат дека го ажурирале членството во СДСМ, а повеќе од нив планираат и да гласаат на внатрепартиските избори на 21 март.
Меѓу оние кои го обновиле членството е и поранешниот пратеник и генерален секретар на СДСМ Горан Минчев. Сепак, тој има забелешка за тоа што парцијално се менува моделот за избор на партиските функции.
„Ваков парцијален избор само на претседателот на СДСМ на директни избори повеќе ќе придонесе за султанизација отколку за демократизација во партијата. На таков начин се создава култ на личност затоа што само претседателот се избира на непосредни избори, додека другите носители на функции одат на конгрес и немаат можност да ја проверат довербата меѓу целото членство. Ако веќе се оди на таков чекор, тогаш на непосредни избори треба да се избираат и заменик-претседателот, генералниот секретар, членовите на Централниот и на Надзорниот одбор, но и претседателите на општинските организации, наместо нив да ги поставува партскиот лидер“,
вели Минчев, посочувајќи дека, во таков случај, потоа би требало да се оди уште еден чекор напред, така што на директни избори ќе се избираат и кандидатите за пратеници и за градоначалници и советници – на локално ниво.
Тој смета дека и досегашниот модел за избор на лидер на партиски конгрес, со гласање на делелегати, обезбедуваше демократичност на процесот.
„Во 2013 година, Заев беше избран на чело на СДСМ во конкуренција со уште двајца кандидати (Зоран Јовановски и Кире Наумов н.з). Зарем тоа не е демократија? Само не знам зошто Заев се премисли. Во времето кога Владо Бучковски ги пласираше иницијативите за директни избори за сите функции, но и за официјализирање фракција во СДСМ (додека Црвенковски беше на чело на СДСМ н.з.), Заев беше против такво решение“,
вели Минчев.
Според Заев, кој овој пат е единствен кандидат за (ре)избор на лидерската позиција, внатрепартиските непосредни избори се крупен чекор кон дополнителна демократизација на партијата.
„Горди сме што сме пример и што водиме напред во многу државни, но и партиски процеси. СДСМ се менува, се демократизира, се подобрува, за подобро да им служи на граѓаните и да внесе нови демократски вредности во нашето општество“,
оцени Заев, откако го потпиша решението за распишување на внатрепартиските избори.
Од 1992 година досега на кормилото на СДСМ беа четворица: Црвенковски (од 1992 до 2004 г. и од 2009 до 2013 г.), Владо Бучковски (од 2004 до 2006 г.), Радмила Шекеринска (од 2006 до 2008 г.) и Заев, кој е на чело на партијата од 2013 година, во два мандати, а во периодот 2008-2009 година беше в.д. претседател. Сите претседатели досега беа избирани на конгрес, со учество на неколку стотици делегати од сите општински организации.