Тексашката снежна сага најверојатно ќе земе и политичка жртва, откако медиумите го фатија на дело сенаторот од Тексас, Тед Круз, како патува во сончевиот Канкун во Мексико, додека неговите гласачи се смрзнуваа дома
Властите во Тексас го вратија снабдувањето со струја во целата држава, што донесе олеснување по неколку дена исклучително ниски температури, но милиони луѓе сè уште имаат проблеми со водата за пиење.
Поради прекинот на електричната енергија, замрзнати цевки и на моменти енромна потрошувачка, системот за пријавување проблеми со вода бил блокиран со илјадници повици.
Од Комисијата за квалитет на животната средина во Тексас објавија дека околу 14,3 милиони од вкупно 29 милиони жители, се погодени со овој проблем, за кои се прават напори да им се достави вода за пиење и храна.
На многу места, луѓето чекаат во долги редици пред црквите или на паркинзите – понекогаш и со часови – чекајќи да добијат вода во шишиња.
„Распределбата на вода, дистрибуцијата сè уште е наш приоритет број еден“,
изјави Ним Кид, шеф на одделот за управување со итни случаи во Тексас, и препорача водата од водоводот да се преврива најрано до понеделник.
Советот за сигурност на електричната енергија во Тексас (ERCOT) во петокот соопшти дека напојувањето е вратено во нормала, но и натаму повеќе од 54 000 клиенти се уште се без електрична енергија поради урнатите далноводи и други прекини.
Поради последиците кои ги остави снежната бура и невремето во југоцентралниот регион, каде 70 лица го загубија животот поради студениот бран, американскиот претседател Џо Бајден прогласи природна непогода во 77 од најпогодените окрузи во Тексас.
Ова им дава овластувања на Одделот за домашна безбедност и Федералната агенција за управување со вонредни состојби (ФЕМА) да ги координираат напорите за ублажување на катастрофата и забрзување на помошта.
Тексас е единствената сојузна држава во континенталниот дел на САД која има своја независна електрична мрежа.
Јавниот обвинител Кен Пакстон започна истрага за тоа како ERCOT и 11 други енергетски компании „несмасно и несоодветно се справија со екстремните зимски временски услови оваа недела“.
Но тексашката драма најверојатно ќе земе и политичка жртва, откако медиумите го фатија на дело сенаторот од Тексас, Тед Круз, како патува во сончевиот Канкун во Мексико, додека неговите гласачи се смрзнуваа дома.