Со ова, на територијата на ЕУ ќе бидат во оптек три вакцини откако ЕМА на 21 декември ја одобри вакцината на „Фајзер“ и на 6 јануари на „Модерна“
Европската агенција за лекови (ЕМА) објави дека добила барање од „Астра Зенека“ и Универзитетот во Оксфорд за одобрување на вакцината против коронавирус, наведувајќи дека одлуката за тоа може да биде донесена на 29 јануари.
„ЕМА доби барање за одобрување за условно пуштање во промет на вакцината против ковид-19 на пазарот развиена од ‘Астра Зенека’ и Универзитетот Оксфорд“,
соопшти европската агенција со седиште во Амстердам.
Доколку биде одобрена, на територијата на ЕУ ќе бидат во оптек три вакцини откако ЕМА на 21 декември ја одобри вакцината на „Фајзер“ и на 6 јануари на „Модерна“.
Агенцијата објави дека ќе го забрза процесот на тестирање на вакцината и дека може да донесе одлука на 29 јануари, доколку доставените податоци се доволно „цврсти и целосни“.
Европската унија и ЕМА се под притисок да го забрзаат одобрувањето на нови вакцини против коронавирусот, кој однесе повеќе од 620 000 животи на целиот континент.