Предупредување за внимателно движење покрај водотеците, суводолиците и во клисурите, поради можност од појава на големи води, излевања, свлечишта и одрони
Високи водостои, натпросечни за овој дел од годината, со опасност од локални излевања. Ваква е состојбата со нивото на реките во земјава, добиена од хидролошките набљудувачи, по големото количество врнежи од дожд изминатите неколку денови.
Од Управата за хидрометеоролошки работи вечрва известија дека во горните делови од сливовите притисокот попушта.
Податоците од 16 часот покажуваат дека Вардар е за 2 сантиметри намален кај Јегуновце, а во Скопје бележи пораст од 15 сантиметри, во Велес нивото е повисоко за 20 сантиметри, додека кај Новаци водите на Црна Река се 28 сантимтри над просечното ниво.
Според УХМР, во Скопје во текот на ноќта, водостојот ќе почне да се намалува, а во Велес рано наутро ќе го достигне својот максимум. Очекуваат сите водостои кај водотеците и понатаму да бидат релативно високи, а како најкритични ги посочуваат горниот и средниот тек на Вардар, Треска, Лепенец, Пчиња, Крива, Црна, Радика и Сатеска.
Во текот на ноќта се очекува намалување на врнежите, а со тоа и притисокот на врнежите врз истекувањата ќе се намали. Водениот бран ќе се префрли во долните делови од сливовите.
Во рамниците има појава на поплавувње на одредени површини, а има и локални излевања кај повеќето водотеци низ државата, па поради тоа и натаму од УХМР предупредуваат на внимателно движење покрај водотеците, суводолиците и во клисурите, поради можност од појава на големи води, излевања, свлечишта и одрони.