Реакции и препукувања меѓу Левица и ВМРО-ДПМНЕ предизвика вчерашната седница со пратенички прашања во Собранието на која лидерот на Левица, Димитар Апасиев, го праша премиерот Зоран Заев дали е вистина или шпекулација дека во периодот од завршувањето на парламентарните избори се до конституирањето на парламентот се обидел да „купува“ пратеници.
Заев рече дека вака поставено прашање без докази е недозволиво за еден лидер на партија, па му порача:
„Негирам каква било инсинуација, срамота е што си дозволувате вакво прашање. Лидер во опозиција вади докази и ги вади во јавноста. Тоа е исто како да ве прашам дали е вистина или шпекулација дека јас и вие сме се договориле да ви ги обезбедиме сите ресурси на изборите само да одземете гласови од ВМРО-ДПМНЕ и при тоа да дадете директен одговор дали е вистина или шпекулација дека договоривме да нѐ поддржувате понатаму ако освоите пратеник“,
порача Заев.
Што пренесоа некои интернет-портали
Набрзо по седницата на некои интернет-портали беше објавена вест со наслов: „Заев призна: Го помогнав Апасиев за парламентарните избори против Мицкоски“.
„Премиерот Зоран Заев, на седницата за пратенички прашања, му се обрати на пратеникот на Левица, Димитар Апасиев, и му порача да каже дали за време на парламентарните избори бил договорен со СДСМ да му ги обезбедат сите логистички и материјални неопходни ресурси само да му зема гласови од контото на ВМРО-ДПМНЕ. Притоа, Заев изјави дека бил договорен со Апасиев по изборите да продолжи да ги поддржува политиките на СДСМ доколку освои пратеник во Собранието“,
напишаа порталот „Република“.
Освен порталот „Република“ веста ја објавија и „Курир“ и неколку други портали.
На ова на социјалните мрежи реагираше пратеникот Апасиев, кој порача дека „вмровски портали по директива се налепиле на реторичкото прашање на Заев“.
И после некој ќе плаче ко повредена тинејџерка, оти не сум пиел кафе со него!? Е оти де? Тактика бе брат“,
напиша Апасиев, алудирајќи на опозицискиот лидер Христијан Мицкоски.
ВМРО-ДПМНЕ: Се јави дежурното “кутре” на Заев
Неговиот статус предизвика реакции од ВМРО-ДПМНЕ.
Пратеникот на ВМРО-ДПМНЕ, Игор Јанушев, го сподели статусот на Апасиев на Фејсбук и напиша дека е платен од СДСМ за да предизвика неединство во опозицијата и да го спречи рушењето на власта.
„Се јави дежурното ‘кутре’ на Заев. Само и сега не одговори дали и колку е дебело пликото кое го зема од Струмица за да го руши рушењето на Зоран Заев преку неединство во опозицијата. Добро е да се види како (демек само во негов уникатен стил) ги ‘вреѓа’ медиумите кои не го ‘мазат’ Заев, а во исто време се ‘лиже’ и ‘коленичејќи’ моли да гостува кај нив. Нема полошо … НЕМА … од лажни ликови, FB патриоти, квази политичари, лигуши … Туку да прашам, како пликцето, стигна ли на време? Тешко на таа партија каде Заев е финансиер, а ФБ патриот глуми месија. П.С. Мислам дека кафето претече, сега останува само да се нагостиш со струмичкото пликце, верувам дека според енергијата што ја вложуваш е прилично дебело“,
напиша Јанушев.
Во сличен стил реагираше и пратеничката од ВМРО-ДПМНЕ, Марија Петрушевска.
Апасиев: Добив абер дека ми спремаат прислушувани материјали
Коментирајќи ги вчерашните пратенички прашања, Апасиев на својот профил на Фејсбук напиша и дека, како што вели, добил „абер од одредени комуњарско-удбашки структури“ дека некој се подготвува да објави во јавноста прислушувани материјали од него.
„Ај вака да си кажеме – не сте ни први, ни последни шо ми се закануете. Знам дека имате прислушкувани снимки за мене уште од ‘бомбите’, знам дека имате видео материјали од илегални ПИ мерки за мое тајно следење за време на референдумската кампања #Бојкотирам, знам дека имате смс или други принт скринови и мејлови од мои преписки со луѓе, како и аудио материјали од средби и пиење кафиња во и надвор од Собрание. Арно ама, знам и тоа дека сум неподмитлив и дека чесно живеам од плата! Не сум корумпиран и не правам ништо илегално или криминално, затоа и вака отворено делувам. Не пијам, не пушам, на се коцкам, не шмркам бело, неам бизниси, неам швалерки, неам дечко, не уценуам студент(к)и за оценки – за да се секирам дека некој ќе ме уценува“,
порача Апасиев.
Тој побара ако некој има докази дека е инволвиран во криминал да ги објави, а ако се приватни разговори, најави тужби.
„Оти, ако имаме озвучени бубици од Службите у пратеничките канцеларии, ондак да стаиме клуч на врата на државата! Ваљда Спикерот Талат Џафери нема да дозволи таква девалвација на највисокиот законодавен дом, оти тоа ќе биде голем скандал сам по себе. Иначе, ДА – се среќавам со кој сакам и каде сакам! Отчет на никој не давам (освен на Жена ми), оти на никој ништо не дужам! Речиси и да нема македонски политичар или јавна личност со која се немам сретнато – и од опозицијата и од власта. Сум бил скоро во сите министерства, Влада, Бихачка и Белата палата… Тоа ми е работа, да терам ПОЛИТИКА. Онака како што сметам дека треба и дека е визионерски, стратешки и тактички. А, гледам дека онака како шо ја тераме со другарите од Левица – ја тераме у вистинска насока. Народ препознава искреност и суди! Затоа рејтинзите се тие, и покрај сите оркестрирани хајки и линчови против нас. p.s. За крај, еве една левичарска честитка за Нова година до нашите политички противници (у коментар) . Бидете така, фајтерски. Се гледаме за арно за убаво. Со НОВИ СИЛИ, во нови победи!“,
порача Апасиев.