Новогодишните празници граѓаните да ги празнуваат одговорно и во кругот на семејството, за да го заштитат здравјето и да го спречат ширењето на коронавирусот, апелираат надлежните.
Тие најавуваат дека сите оние кои за новогодишните празници ќе организираат групни забави во станови или викендици, веднаш ќе се соочат со кривична одговорност.
Дополнителна мерка е и бесплатниот телефонски број објавен од Министерството за внатрешни работи. На тој број граѓаните можат да се јавуваат и да ги пријавуваат соседите доколку се групираат.
Министерот за внатрешни работи, Оливер Спасовски, апелира граѓаните да празнуваат одговорно, во кругот на семејството и на тој начин да придонесат заеднички во справувањето со ковид-кризата.
„Ако за време на новогодишната ноќ бидат издадени викендици или станови каде ќе има 15, 20 или 30 луѓе како група, тогаш и сопственикот на тој објект што го издал и оние кои се присутни на забавата ќе одговараат, односно ќе сносат кривична одговорност“,
вели Спасовски.
Контроли ќе има низ целата територија на државата, во сите градови и во сите туристички центри.
„Да си празнуваме сите одговорно заради тоа што апсолутно мислам дека ќе биде погрешно и никој од нас нема да биде спокоен доколку на новогодишната ноќ организираме каква било забава или прослава или дочек на Новата година во некаков голем круг на пријатели, на соработници итн.“,
вели министерот.
Инаку, и покрај благо намалување на бројот на новозаболени од ковид-19 во текот на претходните денови, вчера беа регистрирани дури 498 нови случаи.
Вкупната бројка на ковид дијагностицирани во земјава од почетокот на епидемијата изнесува 82301. Бројката на оздравени пациенти е 60256, а на починати е 2473. Вкупно има 19572 активни случаи. Институтот за јавно здравје вчера регистрираше вкупно 606 оздравени пациенти, но и 17 починати.