Електорите (избирачите) речиси секогаш гласаат за претседателскиот кандидат што победил во државата што ја претставуваат
Изборниот колеџ составен од 538 претставници на американските држави денеска ќе се состане за официјално да ја потврди победата на Џозеф Бајден на претседателските избори, со што ќе се стави крај на неуспешните обиди на Доналд Трамп да се врати по поразот од 3 ноември.
Изборниот процес во САД не е завршен сѐ додека не гласаат претставниците на електорите (избирачите), чиј број е пропорционален на бројот на жители во секоја од државите. Електорите речиси секогаш гласаат за претседателски кандидат што победил во државата што ја претставуваат.
Резултатите од изборите покажуваат дека демократот Бајден освои 306 од 538 достапни гласа – повеќе од потребните 270, додека Трамп- 232.
Во САД победникот се одредува преку систем на Изборен колеџ, кој им доделува изборни гласови за 50 држави и на дистриктот Колумбија.
Иако понекогаш неколку електори гласаат за некој друг, а не за победникот на изборите во нивната држава, огромното мнозинство ги одразува резултатите од нивната држава, па официјалните лица денеска не очекуваат изненадување.
Трамп ги повика републиканските пратеници да назначат свои електори, игнорирајќи ја волјата на гласачкото тело. Државните застапници во голема мера ја отфрлија идејата.
Гласовите дадени денеска ќе бидат испратени до Конгресот за официјално пребројување на 6 јануари, последната фаза од сложениот изборен процес во САД.