Дваесет и двегодишната родилка од Скопје, која завчера почина во ГОБ „8 Септември“ од компликации со ковид-19, трипати била примена на Клиниката за гинекологија, но одбивала да биде хоспитализирана во делот за ковид-пациенти бидејќи имала негативен тест, а подоцна добила и позитивен ПЦР-тест.
Утрото на 23 ноември ја примиле во Клиниката за гинекологија и акушерство (ГАК) со висока гликемија од околу 30, а претходно, ноќта на 22 ноември, двапати доаѓала, но одбивала да биде хоспитализирана, изјави директорката на ГАК, д-р Викторија Јовановска.
Иако ѝ било кажано дека е ризично за неа и за бебето, таа ја напуштила клиниката бидејќи се почувствувала подобро по примената инфузија, за следниот ден повторно да дојде во многу лоша состојба.
„Не сакала да остане зашто требало да биде хоспитализирана во делот каде што се ковид-позитивните пациенти, а таа имала негативен тест. Меѓутоа, лабораторијата и клиничката слика укажуваа на тоа дека таа е ковид-позитивна. Сите пациенти што се со симптоми ги третираме како суспектни и ги ставаме во одделот за ковид, но не со ковид-позитивните, туку со суспектните пациенти. И покрај тоа, пациентката одбила хоспитализација и кога дошла на 23 утрото веќе била со мртов плод и со многу влошена лабораторија“,
рече Јовановска.
Била префрлена во шок-соба и наредниот ден (24 ноември) со царски рез ја породиле. Плодот од 4,3 килограми бил мртов. Бременоста ѝ била прва, но не одела редовно на контроли, а и дијабетесот зависен од инсулин не бил регулиран. Додека била на ГАК, таа била третирана мултидисциплинарно – од ендокринололог, гинеколог и трансфузиолог.
Немала класични симптоми на вирусот, како температура и кашлање, но имала гастроинтестинални тегоби и нагони на повраќање и дијареја. Направен ѝ бил ПЦР-тест, кој покажал дека е позитивна. На 26 ноември, пациентката била префрлена во ГОБ „8 Септември“ каде што вчера почина.
На новинарско прашање дали имало траги од семејно насилство, бидејќи на ГАК дошла со крвавење од слузници, Јовановска рече дека крвавењето може да е и поради состојбата во која била, како покачени Д-димери, нарушена коагулација и абрупција на постелката.
Јовановска соопшти дека во ковид-одделот на ГАК досега хоспитализирале околу 310 пациентки, од кои околу 180 се породени на Клиниката. Мал дел од нив завршиле во ковид-центрите. Бремените пациентки, рече Јовановска, обично имаат полесни симптоми доколку се контролирани и ако се јавуваат навреме на лекар.
„Апелирам до сите трудници да ги слушаат советите на докторите. Во овој случај, најверојатно немаше да зборуваме за ваков исход, и за бебето и за мајката, доколку пациентката го послушала советот на дежурната екипа. Тие ја молеле да остане, дури и семејството, но не успеале“,
рече директорката на ГАК.