Полицискиот службеник М.С. е лишен од слобода и против него се поднесени кривични пријави врз сомнение дека извршил неколку кривични дела.
„Одделот за внатрешна контрола, криминалистички истраги и професионални стандарди при МВР во содејство со полициски службеници од СВР Скопје го лишија од слобода М.С. поради постоење на основано сомнение дека е сторител на кривични дела фалсификување исправа по член 378, употреба на исправа со невистинита содржина по член 380 и давање лажен исказ по член 367 од Кривичниот законик“,
информира Министерството за внатрешни работи.
Полицискиот службеник откако набавил возило од странство без да ги подмири давачките за увоз на возилото, прикачил регистерски таблички кои претходно ги одјавил со дадена писмена изјава дека му се украдени и таквото возило подолго време го управувал во сообраќај нерегистрирано.
По документирање на случајот до ОЈО Скопје поднесена е кривична пријава против полицискиот службеник, тој е суспендиран и поведена е постапка за утврдување на дисциплинска одговорност.