Бугарскиот европратеник, кој е известувач за нашата земја во ЕП, е потписник на заедничката изјава на дваесетина европратениците со која се бара да не се испушти шансата за зелено светло за одржување на првата меѓувладина конференција со Северна Македонија до крајот на оваа година
Не направивме речиси ништо за да ја објасниме нашата позиција во однос на Република Северна Македонија и наместо тоа се водевме од фактот дека европратениците го простудирале македонското прашање многу внимателно во текот на годините. Ова не може да биде современ пристап во заштитата на националните интереси, вели бугарскиот европратеник Илхан Ќучук за утринската програма на Би-ти-ви.
Ќучук е известувач на ЕП за нашата земја и воедно е потписник на заедничката изјава на дваесетина европратениците со која се бара да не се испушти шансата за зелено светло за одржување на првата меѓувладина конференција со Северна Македонија до крајот на оваа година.
„Ние сме дел од ЕУ и треба да бидеме повеќе разбрани од другата страна. Ова е неконструктивно однесување“,
истакна тој.
Европратениците вчера упатија декларација до Советот на Европа со која се бара да не се одложува почетокот на преговорите за членство со Северна Македонија и Албанија. Според нив, доцнењето ја загрозува довербата на ЕУ во Западен Балкан и го намалува нејзиното влијание во регионот.
„Ова е позиција на 24 колеги кои имаат формална улога во процесот на интеграција на Западен Балкан. Таа има за цел да им пружи рака на земјите кандидати за членство, но и на оние земји каде што преовладува скептицизмот во однос на политиката на проширувањето. Несомнено, неодамнешните противречности во ЕУ се големи, но ние исто така мора да ги задржиме очекувањата и на европските граѓани и на земјите од Западен Балкан на нивниот пат кон членството во ЕУ“,
вели Ќучук во интервјуто.
Европратеникот понатаму укажува дека суверено право на секоја држава е да ја гради својата позиција на национално ниво, а потоа да ја брани во разни меѓународни формати. Но изразуваат загриженост, имајќи предвид за она што е направено последните години за интеграција на земјите во регионот.
„Бугарија е една од земјите што ја ставија интеграцијата на земјите во регионот на многу високо место во својата агенда. Во исто време, сепак, со политичката блокада, нема да има победници, и сите ќе изгубиме. ЕУ ќе изгуби затоа што нејзиниот кредибилитет ќе биде поткопан, ќе се покаже како неспособна за решавање големи геополитички прашања и како глобален играч. Ќе изгубат и Република Северна Македонија и Албанија затоа што вложија големи напори на патот кон членството. На крај, но не и најмалку важно, ќе изгубат и нивните соседи, бидејќи процесот на интеграција бара градење добрососедски односи, кои се поврзани со расчистување на историските спорови “,
вели европратеникот.