Во дебата на „360 Степени“ за тоа дали земјава има систем за координиран одговор при трагедии како онаа кај Ласкарци, новинарот на Алсат, Бесиан Лека, зборуваше за времето потребно на пожарникарите да стигнат на местото на несреќата.
– Ги спомнавте и брусалките и пожарникарите. Пожарникарите пристигнаа последни на местото на настанот, можеби со задоцување од 1 час. Знаете дека имаше многу повредени патници кај кои не можеше ниту да се интервенира. Ни првата помош не можеше да интервенира затоа што истите биле блокирани, биле со фатени делови од телото или згмечени од автобусот, не можеле да се повлечат. И дали можете да ни кажете колку брусалки има, кои центри, кои бригади ги имаат тие брусалки и колку се користат тие? И како го коментирате тоа дека противпожарната екипа на местото на настанот пристигна со еден час задоцнување – праша новинарот Лека.
Службеникот од Центарот за управување со кризи, Драги Тарчуговски рече дека не се работи за доцнење во условите кои ги имале пожарникарите.
– Можеме да правиме симулација дали е доцнење или не е, кога станува збор за да се помине во времето кога е гужва во Скопје, од Автокоманда до Ласкарци, со камион. Моите податоци говорат дека не е еден час, туку некаде околу 40 минути. Тоа е релативно брзо време во однос на можностите што ги има таа релација, бидејќи несреќата не е на 5 минути од Противпожарната еднициа туку скоро на половина пат меѓу Скопје и Тетово – рече Тарчуговски.
Тој рече дека овие апарати се клучни и ги има само противпожарната бригада и само тие се оспособени и знаат да ракуваат со такви средства.
– И факт е дека тие ја завршија својата работа во рамките на своите можности. Во делот на одговорот немам никаква дилема дека системот одговори на задачите кои се очекуваат од него. А во делот на меѓуинституционалната координација има простор за надградба – рече Тарчуговски.
Напишете коментар