Наредната година се одбележуваат 100 години од раѓањето на Блаже Конески – настан кој е запишан и во календарот на УНЕСКО. Тоа, вели премиерот, е уште една глобална афирмација на македонскиот јазик
Историската наука не може да им го откажува на едни тоа што на други им го признала како нешто што се подразбира само по себеси.
Со овој цитат од Блаже Конески, премиерот Зоран Заев по повод годишнината од неговата смрт му оддава почит и порачува дека никој денеска не може да ја оспорува автентичноста на македонскиот јазик.
„Големината и значењето на животот и делото на Конески за македонскиот идентитет, за македонската национална култура, за македонскиот јазик го прават не само втемелен факт во историјата, туку и жив двигател на нашата сегашност во разни области – во науката за јазикот, во уметноста и силата на зборот, во моќта да го закрепнува нашето духовно самочувство кога ни остави завет да го чуваме јазикот, зашто јазикот е нашата татковина. Денес, македонскиот јазик е дел од светската енциклопедија јазици и никој не може да ја негира неговата автентичност. Жив јазик на македонскиот народ со свој изворен правопис, граматика, речник, и своја континуирана и развојна историја“,
пишува Заев.
Блаже Конески почина на денешен ден во 1993 година, а беше роден на 19 декември 1921. Наредната година ќе се одбележат 100 години од неговото раѓање и тој датум, потенцира Заев, е впишан како настан за одбележување во календарот на УНЕСКО за 2021 година.
Со тоа, според премиерот, светот оддава признание за длабоките хуманистички идеали и научни достигнувања кои се признаени и од светската академска јавност.
„Тоа е уште една глобална афирмација на македонските јазик, наука и култура со програма со која во национални и во меѓународни рамки ќе се одбележи оваа значајна годишнина. Великаните не заминуваат никогаш. Таков е и Блаже Конески. Тој со своето сеприсуство и денес ги побива и се надвишува над сите злонамерници што го напаѓаа и го нарекуваа ’џуџето од Небрегово‘, а денеска му ги читаат песните. Ништожни се таквите чинови на порекнување на големите македонски дела и големите македонски дејци, ништожни се во споредба со громогласниот џин заштитник на македонската реч“,
вели Заев.