Грчките медиуми објавија фотографиите на кои има повеќе луѓе, при што никој не носи маска ниту е на физичко растојание
Од владата го правдаат дека не сакал да ги одбие луѓето што сакале да се фотографираат со него
Грчкиот премиер Киријакос Мицотакис се најде на удар на јавноста откако беа објавени фотографии во медиумите и на социјалните мрежи на кои се гледа како тој и неговата сопруга возат велосипеди за време на забраната за движење, која ја донесе владата на чие чело е тој.
Тие возеле низ шума, оддалечена околу час и половина од Атина со автомобил, а на фотографиите има повеќе луѓе, при што никој не носи маска ниту е на физичко растојание, ги пренесува „Политико“, пишувањата на грчките медиуми.
Во моментов, во Грција во сила е забрана за напуштање домовите, со одредени исклучоци – само за на работа, до најблиската продавница или на лекар, додека групирањето е ограничено на три лица. За кршење на оваа мерка, казната е 300 евра, а полицијата објави дека прекршителите биле казнети со вкупно 780 000 евра минатиот викенд, но не и премиерот и неговата сопруга.
Најстрогите мерки во Грција се во сила до 7 декември, но владиниот портпарол Стелиос Пецас рече дека тие најверојатно ќе бидат продолжени бидејќи епидемиолошката состојба не е значително подобрена. Пецас, за случајот со премиерот, рече дека е цел на напади затоа што е хуман човек кој никогаш не го одбива барање некој да се фотографира со него.
Но, од опозициската Сириза велат дека да се обвинуваат и да се казнуваат граѓаните за непочитување на прописите и истовремено да се кршат пропишаните мерки во никој случај не е хуманост, туку е знак на ароганција и недостиг на емпатија.