Од денеска медицинскиот персонал во ковид-одделенијата на интерните клиники во Скопје ќе биде засилен со 12 лекари и 20 медицински сестри од Воено-медицинскиот центар.
Тие засега ќе работат во тријажниот центар на Клиниката за интерни болести каде што ќе вршат прием на пациенти во ковид-одделенијата.
„Оваа бројка на медицински персонал е голема поддршка, земајќи предвид дека сите специјалисти од интерна медицина и инфектолози од почетокот на кризата се посветени на ковид-пациенти“,
велат од Министерството за здравство.
Оттаму потсетуваат дека ова е само последниот од низата чекори со кои Армијата се вклучи во справувањето со ковид-ситуацијата.
Во петокот Министерството за здравство преку Министерството за одбрана доби 10 000 брзи теста, донација од Кралството Норвешка, а на почетокот од месецов Армијата даде на користење и 5 амбулантни возила.
Исто така, припадници на Армијата, како невооружена сила се вклучија во обезбедувањето на ковид-центрите како поддршка на полицијата. Последните информации од петокот се дека во обезбедувањето се вклучени 195 војници.