Вкупно 42 800 трослојни заштитни маски и 5 илјади заштитни мантили во висина од над еден милион денари се донирани од страната компанијата „Пекабеско“ за Инфективната клиника во Скопје.
„Како компании лидери имаме двојна одговорност во вакви кризни времиња. Првата е секојдневно да се бориме со економските последици, а истовремено да се избориме да го задржиме бројот на вработени и редовно да ги плаќаме платите, даноците и другите јавни давачки, со цел да придонесеме за функционирање на целокупниот општествено-економски систем. Втората улога која е еднакво важна, а тоа е максимално да ја покажеме личната и корпоративната одговорност, давајќи конкретна поддршка и помош за здравствените работници кои деноноќно се наоѓаат во првите борбени редови против ковид-19“,
вели Слободан Кутревски, извршен директор на „Пекабеско“.
Од компанијата најавуваат дека поддршката што ја обезбедуваат во борбата со ковид-19 ќе продолжи и во иднина.
„Постојано сме во координација со нашите партнери и соработници во рамки на општествено-одговорната компонента на ‘Пекабеско’. Веќе се планираат и донации во храна за дел од семејствата кои се во социјален ризик, како и други активности онаму каде што е најнеопходно. Би сакал да ги повикам сите наши соработници и други компании да ги следат општествено одговорните практики на бизнис-заедницата, бидејќи во оваа криза предизвикана од ковид-19 е повеќе од неопходно секој од нас да го даде својот придонес во рамки на своите можности“,
вели Кутревски.
Од почетокот на ковид-кризата, „Пекабеско“ во неколку наврати донираше пакети со храна за социјално загрозени семејства. Компанијата ја продолжи и годишната соработка за поддршка на Пунктот за бездомници на Црвениот крст на Градот Скопје преку донација на производи.
Исто така, на почетокот на корона-кризата, „Пекабеско“ изврши аконтативна уплата на целокупниот пресметан данок на добивка за 2020 година, а презема и низа на други мерки со цел дополнителен конкретен придонес во националната борба против коронавирусот.