Епидемиологот Драган Даниловски во дебата за „360 Степени“ даде неколку сугестии до Комисијата за заразни болести.
„На пример, стои дека треба да се носат маски на отворено. Тоа е мошне воопштена формулација и јас се согласувам дека во закон не ни може поконкретно да стои. Но затоа постојат подзаконски акти и правилници во кои можат во детали да се набројат ситуации апсолутно најконкретно каде на отворено треба да се носи маска. На пример, зарем ако седнам на клупа на Водно или во Парк треба да носам маска, или на кеј? Или на пикник на трева на ќебенце? Кога станува збор за кафеаните, гледам реакции на социјалните мрежи, како тоа на отворено ќе биде задолжително носење маска а во угостителските објекти може да не се носи маска? Јас морам да кажам дека тоа е затворен простор. Независно од предвидените дистанци и колку и да се почитуваат протоколите, таму епидемиолошкиот ризик е повисок отколку и во гужва на отворено. Затоа мислам дека би било паметно да се бара сите угостителски објекти да имаат инсталирано прочистувачи на воздух. Се редуцира бројот на патници во автобусите на 50% ама јас не разбрав дека компензаторно ќе се зголеми бројот на автобусите. Или евентуално да се воспостави скалесто работно време. Зошто такви прочистувачи на воздух да не се бараат да се постават и во текстилните фабрики? Знаеме дека и тие во источна Македонија беа жаришта. Мислам дека е многу битно енормно да се зголеми бројот на тестирањата, ако е можно и до 10 илјади дневно. И да не се прават викенд-паузи затоа што се добива нешто што јас во една прилика го нареков јојо ефект. Вие ќе дозволите да се шири вирусот за време на викенд и после тоа во тек на неделата ги гледате последиците. Дефинитивно мора да се корегира начинот на регистрирање на причината за смрт од Ковид-19. Вака како сега што се прави, кога сите позитивни починати во државата, независно какви коморбидитети и независно од која причина умреле, се водат како Ковид-19, тоа само непотребно ја зголемува бројката на починати кај нас и споредено со другите земји излегуваме на врвот. Мора да се разграничат, кои се починати од Ковид како основна причина за смрт, и кои со Ковид. Тоа не значи дека евиденцијата за позитивните, за овие со Ковид ќе се изгуби. Таа ќе се регистрира и можат како посебен контингент да се соопштат. Ама кога смртноста се соопштува меѓународно дефинитивно е неопходно да се разграничат овие две категории“,
вели Даниловски.