Три медицински сестри од Универзитетската клиника за гинекологија и акушерство се позитивни на ковид-19.
Тие, според информациите, се заразиле преку семеен контакт, а директорката на Клиниката, Викторија Јовановска, и уште еден лекар се во самоизолација поради заболени членови на нивните семејства.
Директорката Јовановска во изјава за МИА вели дека трите медицинските сестри се заразиле преку контакт од надвор, односно семеен контакт, а не на Клиниката.
„Ние двајцата доктори сме во самоизолација. Не сме со решение за изолација, туку сме во самоизолација поради тоа што во семејствата имаме повеќе од тројца заболени. Се тестиравме. И јас и докторот сме негативни. Мајка ми, сестра ми и внучето се позитивни, како и уште две внучиња од сестра ми. Јас не сум имала контакт со медицинските сестри. И членови на семејството на лекарот, исто така, се позитивни. Поради тоа сме во самоизолација“,
посочи Јовановска.
Додаде дека на Клиниката сите ги почитуваат протоколите за носење лична заштитна опрема.
„Во овие седум месеци никој не се заразил на Клиниката. Нема никаква опасност да се заразат пациенти и персонал. Од понеделник уште еднаш ќе се тестираме, ако имаме негативен тест, ќе одиме на работа“,
додаде д-р Јовановска.