Во пожарите досега загинаа четири лица
Турските пожарникари трет ден се борат со шумските пожари. Десет пожари сè уште се активни, вклучително и три во реонот на летувалиштето Анталија. Од 98 пожари што избувнаа во средата во различни региони, пак, 88 се ставени под контрола.
Гаснењето на огнот на брегот на Средоземно Море е отежнато од силните ветрови. Голем број региони и хотели се евакуирани, а туристите се однесени на безбедно место.
Во пожарите досега загинаа четири лица.
Претседателот на Турција, Реџеп Тајип Ердоган денеска подрачјата зафатени со шумски пожари ги прогласи за „зони на катастрофи“.
Покрај човечките жртви, турските власти посочија дека во пожарите настрадале најмалку и 150 говеда, илјада овци, 600 хектари земјоделско земјиште, а оштетени се и 50 хектари оранжерии.