Освен со екипата на МИА, инцидент имало и со новинар на дневниот весник „Слободен печат“, кој бил спречен да ги извршува своите задачи од страна на полициски службеници, јави Самостојниот синдикат на новинари и медиумски работници
Здружението на новинарите на Македонија (ЗНМ) остро го осудува денешниот напад врз екипа на Медиумската информативна агенција (МИА) на протестот поврзан за случајот „Монструм”.
„Според кажувањата на колегите од МИА, имало обид да им се одземе опремата и турканици, при што снимателот бил турнат, а неговата опрема оштетена. Ваквиот однос кон новинарите кои се на работна задача на терен е неприфатлив и потребно е да биде строго казнет од страна на Министерството за внатрешни работи затоа што насилството кон новинарите не е дозволив во демократски земји“,
наведува ЗНМ.
ЗНМ уште еднаш предупредува дека неказнивоста на нападите и медиумските работници може да поттикне посериозни насилства кон новинарите, а со тоа дополнително да се загрози нивната безбедност, правото на слобода на изразување, како и правото на информирање на граѓаните. Затоа е важно, дополнува ЗНМ; што поскоро да се измени Кривичниот закон во насока на системска заштита на новинари и медиумските работници.
Освен екипата на МИА, инцидент имало и со новинар на дневниот весник „Слободен печат“, кој бил спречен да ги извршува своите задачи од страна на полициски службеници во цивилна облека, јави Самостојниот синдикат на новинари и медиумски работници (ССНМ).
„Во текот на протестите од страна на демонстрантите физички била нападната новинарска екипа на новинската агенција МИА, при што имало и обиди за одземање на опремата за снимање. За среќа нападнатите медиумски работници се извлекле без посериозни повреди. Во вториот случај, новинар на дневниот весник Слободен печат бил спречен да ги извршува своите задачи од страна на полициски службеници во цивилна облека кои го извлекле на страна, му ја свиткале раката, безобразно и дрско се однесувале кон него и не го пуштиле додека не го избрише снимениот материјал со изговор дека ги снимал полицајците во лице“,
наведува Синдикатот.
ССНМ смета дека ваквото однесување на полициски службеници е недозволиво и бара остра и ефективна реакција во изнаоѓање и казнување на полициските службеници кои го оневозможиле новинарот на „Слободен печат“ да си ја извршува својата работна задача. Воедно бара од надлежните државни органи да ги пронајдат и казнат насилниците во врска со нападот врз екипата на МИА.
„ССНМ силно протестира против ваквите инциденти бидејќи напад врз новинарите и медиумските работници е напад и врз слободата на изразување и правото на информирање на граѓаните“,
стои во соопштението од Самостојниот синдикат на новинари и медиумски работници.