„Само за потсетување, ова е четврти негативен испад на политичар кон новинари во изминатиот период, а првите три беа на Димитар Ковачевски, Али Ахмети и вчерашниот случај во МОН, со советникот на министерот Јетон Шаќири. Токму затоа, ЗНМ ќе ги извести партнерските организации, вклучувајќи ги и ОБСЕ, Европската федерација на новинари (ЕФН) и Совет на Европа“, велат од ЗНМ
Здружението на новинари на Македонија (ЗНМ), Советот за етика во медиумите на Македонија (СЕММ) и Агенцијата за аудио и аудиовизуелни медиумски услуги (АВМУ) остро го осудија однесувањето на министерот за економија Крешник Бектеши кон новинарите за време на денешната прес-конференција во Владата.
Имено, министерот Бектеши пред да ѝ одговори на новинарката, која на прес-конференција постави прашање поврзано со порастот на цената на природниот гас, наместо соодветен одговор на прашањето, Бектеши одговори дека новинарката веројатно има добра соработка со колегите штом ги поставува нивните прашања.
Ваквото однесување на министерот, според ЗНМ, не е изолиран случај туку негативен тренд на однесување кон новинари што бележи пораст и кој мора да престане.
„Само за потсетување, ова е четврт негативен испад на политичар кон новинари во изминатиот период, а првите три беа на Димитар Ковачевски, Али Ахмети и вчерашниот случај во МОН, со советникот на министерот Јетон Шаќири. Токму затоа, ЗНМ ќе ги извести партнерските организации, вклучувајќи ги и ОБСЕ, Европската федерација на новинари (ЕФН) и Совет на Европа“,
велат од ЗНМ и додаваат оти е крајно време функционерите сериозно да ја сфатат својата позиција и да престанат со директни вербални напади кон работата на новинарите.
Од Здружението нагласуваат дека кај државните функционери што се во служба на јавноста не смее да постои ваков начин на комуникација кој, како што додаваат, е крајно несоодветен, непримерен, дрзок и навредлив кон новинарите, а со тоа и кон целата јавност на која треба да ѝ бидат пренесени информациите.
Осуда за однесувањето на министерот за економија кон новинарите упатија и од Агенцијата за аудио и аудиовизуелни медиумски услуги (АВМУ) од каде што нагласуваат дека упатувањето навреди и омаловажувања кон новинари се апсолутно недозволиви. Однесувањето на Бектеши го оценија како недолично и неприфатливо.
„Медиумите се еден од клучните столбови на демократијата и имаат важна улога во креирањето на критичкото мислење за прашања што се од посебен јавен интерес. Наместо омаловажувања и навреди треба да се покаже почит кон новинарската професија и достоинството на медиумските работници“,
велат од АВМУ.
Оттаму додаваат дека е неопходно да се вложат максимални напори за обезбедување поволен амбиент за непречено работење на медиумските работници, имајќи ја предвид нивната улога во отворањето прашања од јавен интерес и обезбедувањето транспарентност и одговорност на јавните органи.
Дека однесувањето на Бектеши на денешната прес-конференција е неприфатливо и скандалозно оценија и од Самостојниот синдикат на новинари и медиумски работници (ССНМ) од каде што порачаа дека таквото однесување може да ја отежни работата на новинарите и да предизвика самоцензура.
„Синдикатот бара од функционерите да престанат со дискредитација на новинарите и медиумските работници и да престанат да се впуштаат во оцена за тоа како и за која цел тие поставуваат прашања за кои постои јавен интерес. Денешниот неприфатлив однос на Бектеши кон новинарите е само уште еден во низата на неприфатливи однесувања на политичарите кон нив кои зачестија во изминатиот период и за кои ССНМ смета дека е време да престанат“,
се посочува во соопштението од ССНМ.