Министерот за економија, пред да одговори на новинарско прашање околу висината на цената која се плаќа за природниот гас, во прес-центарот на Владата се скара со новинарите велејќи им дека имаат добра соработка со колегите од другите телевизии штом се поставуваат нивните прашања
За мене како министер за економија, но убеден сум и за Владата, најважно е да ја поттикнеме конкурентноста, да не дозволиме во одредени сектори да има монопол како што беше претходно со природниот гас. ЕСМ објави јавен повик за февруари на кој имало двајца понудувачи, меѓу кои мислам дека не бил „Макпетрол“. Ако имаат подобри цени и услови, ги повикувам да учествуваат на повикот и, секако, оној што има најниска цена и нуди подобри услови, законски ќе го добие повикот.
Вака министерот за економија Крешник Бектеши одговори на денешното новинарско прашање дали не беше избрзана одлуката на ЕСМ за склучување месечен договор по фиксна цена од 98 евра кога на берзата цената е многу пониска, но и со оглед дека „Макпетрол“ вчера објавил дека цената на гасот за февруари е 40 отсто пониска од онаа за јануари.
Бектеши пред да ѝ даде одговор на новинарката што го постави ова прашање, а која не беше од телевизија „Телма“, најпрво ѝ одговори дека веројатно има добра соработка со колегите штом ги поставува нивните прашања.
„Добра соработка веројатно имате со колегите, ви ги даваат нивните прашања што сакаат да ги постават, но нема проблем, тука сум и секогаш отворен транспарентно да одговорам“,
истакна Бектеши.
На тоа реагираше новинарот од „Телма“ кој присуствуваше на прес-конференцијата и кој му укажа на министерот дека е време да престане со коментарите. На ова Бектеши посочи дека „не е место тука да се даваат коментари, туку да се поставуваат прашања“.
„Не сте тука повикани да давате коментари, туку да поставувате прашања. Ако мисите дека во прес-центарот може да давате коментари, тоа може да го направите во вашите емисии, да ги повикате луѓето што сакате да ги прашате и да дебатирате, не е тука местото да се дебатира туку да се поставуваат прашања, а наше е да одговориме и како сакаме да одговориме“,
рече Бектеши кој сепак потоа јавно се извини.
Тој појасни дека не е навреда ако некој со некого има одлична соработка.
„Ако мислите дека е навреда, се извинуваме, но мислам дека не е навреда да се кажува дека луѓе или одредени институции, правни субјекти, соработуваат одлично меѓу себе. Како што ние имаме одлична соработка, на пример, со Министерството за енергетика во Турција, и вие како институција може да имате соработка. Можеби за вас изгледа иронично, ако е така, се извинуваме. Но, кога има одлична соработка меѓу две приватни лица, правни субјекти или институции, мислам дека не е навреда“,
повтори Бектеши.
На прашањето зошто годинава се плаќа поскап гас, Бектеши рече дека за тоа дали плаќаме поскап или поевтин гас, ќе се види на крајот на грејната сезона. Според ЕСМ, како што рече Бектеши, лани, кога имаше монопол, плаќавме многу поскапо, а сега има конкурентност и ги повика сите што имаат лиценца за снабдување да се пријават и да дадат понуда, а не да кажуваат цени и понуди кога ќе заврши повикот.