Со денешната одлука на РКЕ, малопродажните цени на горивата се намалуваат во просек за 2,80 отсто
Регулаторната комисија за енергетика и водни услуги (РКЕ) денеска одлучи значително да ги намали цените на горивата во земјава. Според одлуката, цената на еуросупер БС-95 се намалува за 3,50 денари за литар и ќе изнесува 90 денари, додека на еуросупер БС-98 се намалува за два денари и ќе се продава за 92 денари.
Цената на еуродизел (Д-Е V) се намалува за три денари и со тоа малопродажната цена ќе изнесува 90 денари. Екстра лесното масло за домаќинство (ЕЛ-1) ќе се продава по цена 87,50 денари, што е намалување за 3,5 денари. Се намалува и малопродажната цена на мазутот (М-1 НС) за 0,557 денари и ќе изнесува 52,786 денари по килограм.
Со одлуката на РКЕ се врши намалување на малопродажните цени на нафтените деривати во просек за 2,80 проценти во однос на одлуката од 5 август.
Од РКЕ укажуваат дека референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 3,569 проценти, кај дизелот за 2,117 проценти, кај екстра лесното масло за 2,960 проценти и кај мазутот за 1,402 проценти
Курсот на денарот во однос на доларот во изминатиот период по кој беа формирани цените со претходната пресметка е понизок за 0,117 проценти.