Повеќе од 100 невладини организации низ светот побараа од Обединетите нации да се воведе нов член во Универзалната декларација на човекови права – „Право на живот на здрава планета“.
Целта е да се вклучи алармот и да се поттикне меѓународна засилена борба со климатските промени и загадувањето.
Кон ваквата иницијатива се приклучи и Македонско еколошко друштво (МЕД).
„Доколку ја потпишете оваа петиција ни овозможувате да бараме од нашите претставници во Обединетите нации да ја поддржат оваа иницијатива. Вашиот глас овозможува подобра основа за борба со климатските промени и загадувањето, подоследно применување на националните закони од областа на заштита на животната средина и посуштинско информирање и образование за оваа тема“,
се вели во нивното соопштение во кое е посочен и линкот до петицијата.
Доколку граѓанските организации ширум светот успеат во иницијативата, ова ќе биде првиот амандман кон Декларацијата од нејзиното воспоставување во 1948 година.
Според заменик-директорот на Македонско еколошко друштво, Методија Велевски, ниту една држава, односно нејзините граѓани, не можат целосно да се изборат за ова право настапувајќи самостојно.
„Како еколошка организација, нам ни е драго дека нашиот устав го гарантира правото на секој граѓанин на здрава животна средина. Од друга страна, сведоци сме дека тоа е гаранција која тешко се исполнува. Затоа ни е јасно дека ниту една држава, односно нејзините граѓани, не можат целосно да се изборат за ова право настапувајќи самостојно. Природата, животната средина – тие немаат граници, и сè додека нивната заштита не стане цел на сите граѓани на планетата, човештвото ќе се соочува со зголемен ризик од влошување на условите за живот. Во таква состојба, гарантирањето и исполнувањето на гаранциите за здрава животна средина, како основно човеково право, мора да ги надрасне државните граници. Затоа, и вас ве повикуваме да учествувате во оваа глобална кампања, да помогнете правото на здрава планета да биде универзално право“,
изјави Велевски.
Специјалниот известувач од ОН за човекови права и животна средина, Дејвид Бојд, исто така ја поддржа кампањата.
„Осигуреното право на здрава природна средина е она што им овозможува на многу држави во светот да напредуваат. Затоа сега треба да го искористиме налетот на глобалните еколошки кризи за да ги убедиме Обединетите нации дека признавањето на ова право ќе биде од корист за сите нас. Човековото право на здрава планета, ако се признае од страна на сите нации, ќе биде едно од најважните човекови права во 21. век“,
истакнува Бојд.
Според Светската здравствена организација, 23 отсто од смртните случаи во светот се поврзани со загадување или уништување на нашата природна средина, а стотици милиони луѓе страдаат од болести поврзани со нездрава животна средина.