Жерновски: Одговорност од Чулев за спотот за полицијата

Се врати ВМРО-МВРО, коментира заменик-министерот за надворешни работи за спотот за кој министерот за внатрешни работи рече дека бил за Денот на полицијата

Заменик-министерот за надворешни работи и член на раководството на СДСМ Андреј Жерновски смета дека министерот за внатрешни работи Наќе Чулев треба да понесе одговорност за спотот за полицијата што се снимаше вчера во Скопје за време на полициски час.

Чулев објасни дека спотот што се снимал во полициски час бил за Денот на полицијата

„Како вчера да беше тоа горчливо чувство во нашите утроби кога ја слушнавме Гордана Јанкуловска како ја кажува вистината за начинот на кој таа и нејзината партија раководеа и владееја со Министерството за внатрешни работи, односно кога ВМРО и МВР функционираа како едно“,

напиша Жерновски на својот фејсбук профил.

Не помина многу време оттогаш, додава, за да сфатиме колку брзо можат истите злобни духови од минатото да се вратат на истото место.

„Можно ли е во самата ДНК на партијата да е потребата од злоупотреба на државните институции за свои партиски цели? Како е возможно за толку кратко време да се случат низа на скандали, чиј крај не се ни гледа? Завчера беше „отсјајот” од рацете на телохранителите на Мицковски, вчера беше упадот во магацинот на Заеви од каде се донираат хуманитарните пакети, денес е скандалот со снимање спот со педесетина полициски возила“,

пишува Жерновски.

Сите тези, посочува тој, дека Министерството, односно партијата се грижи исклучиво за здравјето и безбедноста на граѓаните паднаа во вода.

Петровска: Зарем полициските службеници треба да бидат статисти во спот?

„Сред пандемија и полициски час да ги повлечеш возилата и полициските службеници, да ги оставиш улиците на Скопје празни и небезбедни за да си снимаш реклами пред спортскиот центар „Борис Трајковски“, без никакви дилеми е штетен и суициден потег за кој мора да се одговара“,

наведува Жерновски на ФБ.