Евроамбасадорот Жбогар пред завршување на неговата мисија во земјава, во интервју за „360 Степени“ зборуваше за тоа дали е реалистично да се очекува дека првата меѓувладина конференција ЕУ – Северна Македонија, која де факто ќе значи почеток на пристапните преговори, би можела да се одржи до декември годинава.
„За да се одржи оваа меѓувладина конференција треба да имаме заедничка преговарачка позиција на ЕУ. За ова прашање подолг период се преговара, оваа недела земјите членки ја рестартираат дискусијата врз основа на предлог-рамката што ја изготви Европската комисија. Штом се усогласи заедничката позиција, меѓувладината конференција ќе биде закажана. Слушнав дека германското претседателство со ЕУ е решено оваа конференција да се одржи до крајот на годинава, во текот на претседавањето на Германија. Така што, директоно да одговорам на прашањето – се надевам и сметам дека можеме реалистично да очекуваме меѓувладината конференција да се одржи пред крајот на годинава“,
вели Жбогар.
Во однос на неговата позиција во однос на барањата на Бугарија за дефинирање на Преговарачката рамка за Северна Македонија Жбогар вели дека рамката се разгледува меѓу земјите членки и дека не би било соодветно да коментира за позициите на која било земја членка во однос на оваа затворена дискусија.
„Она што за мене е важно се заедничките позиции кои се резултат на овие дискусии. Заедничката позиција што засега ја имаме е онаа од март при што сите земји членки, вклучувајќи ја и Бугарија, беа „за“ отворање преговори со Северна Македонија. Ова е она што сега се случува и не би требало да одам понатаму од тоа“,
вели Жбогар.