Пратениците на ВМРО-ДПМНЕ во последен момент се повлекле од барањето за двотретинско мнозинство за одземање имунитет на пратеник, откако владејачките партии направиле отстапка во однос на предлогот процедурата за донесување закони да се ограничи на три дена
Пратениците на ВМРО-ДПМНЕ и во новата сесија од дијалогот „Жан Моне“, посветена на собранискиот Деловник, инсистирале да се смени принципот за одземање имунитет на пратеник. Опозицијата, за време на дијалогот кој се одржуваше во петокот и во саботата во парламентот, а во кој учествуваа и тројца европарламентарци, го вратила во игра предлогот од кој еднаш се откажа – поради образложението на владејачките пратеници дека пратеничкиот имунитет е уставна категорија.
Опозициските пратеници, според информации на „360 степени“, се заложиле имунитетот да се одзема со двотретинско мнозинство, наместо сегашното решение според кое парламентот може да даде „виза“ за кривично гонење и одредување притвор на пратеник со минимум 61 глас. Претходно, ВМРО-ДПМНЕ предлагаше и во Деловникот да се предвиди можност за враќање на имунитет на пратеник.
Потребно мнозинство
Од пратеници на ВМРО-ДПМНЕ, кои се вклучени во процесот „Жан Моне“, не добивме денеска потврда за нивното барање за поголемо мнозинство за одземање на имунитет на пратеник. Од пратеничката група на СДСМ, пак, тврдат дека опозициската партија на крај се согласила да го повлече овој предлог, ама откако бил направен компромис. Така, владејачките партии го повлекле предлогот постапката за донесување закон да трае максимум по три дена во матичната комисија и на пленарна седница. Поентата, пак, на тој предлог на владејачките партии беше да се оневозможи некои значајни точки да се одолговлекуваат со месеци од дневно-политички причини.
Потпретседателот на парламентот Горан Мисовски потврдува дека предлогот на ВМРО-ДПМНЕ за двотретинско мнозинство за одземање пратенички имунитет бил една од најспорните точки во рамки на оваа сесија од дијалогот „Жан Моне“. Вели дека опозицијата се повлекла од ова барање откако и владејачките пратеници направиле отстапка.
„Во претходните години, кога ВМРО-ДПМНЕ беше на власт, двапати беше менуван собранискиот Деловник без вклученост на опозицијата. Сега решивме да го смениме принципот, така што во текот на овој дијалог беа прифатени голем број предлози на сегашната опозиција и се предвидени новини што ќе овозможат зајакнување на нејзината улога во Собранието. Сепак, ВМРО-ДПМНЕ, веројатно, поради тоа што е свесна дека останува во опозиција, и овој пат бараше да се смени мнозинството за одземање на имунитетот и да не се ограничува времетраењето на постапката за донесување закони“,
вели Мисовски.
Во Уставот, сепак, не е прецизно наведено мнозинството за одземање имунитет на пратеник, туку потребните најмалку 61 глас се зацртани во собранискиот Деловник. За разлика од тоа, во однос на одземање мандат на пратеник, во Уставот стои дека е потребно двотретинско мнозинство.
Случаи
Овој собраниски состав постави своевиден рекорд според случаите на одземање имунитет на пратеници. Се почна со одземањето на имунитетот на шестмина пратеници како осомничени за учество во насилствата во парламентот на 27 април 2017 година. Потоа, петмина од пратениците беа и обвинети, за на крајот да бидат амнестирани спроти донесувањето на уставните измени што произлегоа од Преспанскиот договор. Поранешниот и долгогодишен претседател на парламентот Трајко Вељаноски, пак, се спаси од одземање на имунитетот како осомничен за организирање на настаните на 27 април. Во неколку наврати им беше одземан имунитет и на опозициски пратеници за предмети на СЈО, како и за случаи што се однесуваа на работата на претходната влада на ВМРО-ДПМНЕ. На поранешниот премиер Никола Груевски, исто така, му беше одземен имунитетот за повеќе случаи, но откако избега од државата.
Неодамнешната сесија од дијалогот „Жан Моне“, сепак, не резултира со договор за донесување на измените во собранискиот Деловник до распуштањето на оваа собраниска гарнитура. Донесувањето на новините што се усогласени досега, сепак, ќе остане како обврска на идните пратеници, што ќе бидат избрани на 12 април.
„Дијалогот ’Жан Моне’ обезбеди платформа што ги зближи политичките партии во време на предизвик на патот на Северна Македонија кон ЕУ. Очекуваме изборите да бидат спроведени во согласност со највисоките национални и меѓународни стандарди. Успехот на Собранието во помагањето да се сочува клучниот консензус за реформите поврзани со ЕУ преку дијалог е непроценливо демократско достигнување. Сега сметаме на заложбата на политичките групи да го достават новиот Деловник по изборите. Реформираните правила ќе му овозможат на новиот состав на Собранието веднаш да се фокусира на својата клучна работа“,
се наведува во заедничкото соопштение на македонските и европските пратеници што беа вклучени во дејалогот „Жан Моне“ минатиот викенд.