Ограничувањето на цената на гасот може да се активира почнувајќи од 15 февруари 2023 година, откако договорот ќе биде формално одобрен од земјите членки на ЕУ во писмена форма, по што ќе може да стапи во сила
Министрите за енергетика на Европската Унија денеска договорија ограничување на цената на природниот гас во блокот која треба да изнесува 180 евра за мегават-час, пишува Ројтерс.
Ограничувањето е најновиот обид на ЕУ да ги намали цените на гасот што ги зголеми сметките за енергија на граѓаните и доведе до рекордно висока инфлација оваа година, откако Русија го прекина најголемиот дел од испораките на гас во Европа.
Договорено е ограничувањето да се активира доколку цените надминат 180 евра за мегават-час за три дена на предмесечниот договор на холандскиот центар за гас за транспорт (ТТФ), кој служи како европски репер, според документите видени од Ројтерс.
Ограничувањето на цената на гасот може да се активира почнувајќи од 15 февруари 2023 година, откако договорот ќе биде формално одобрен од земјите членки на ЕУ во писмена форма, по што ќе може да стапи во сила.
Договорот следува по четиримесечните преговори во кои земјите членки на ЕУ не успеаја да постигнат договор дали ограничувањето на цената ќе помогне или ќе ги попречи обидите на Европа да ја запре енергетската криза.
Пред две недели, на 5 декември, Европската Унија, групата земји Г7 и Австралија се договорија за ограничување на цената на руската сурова нафта од 60 долари за барел.