Со показни вежби на армијата и надлетување на сојузнички воздухоплови денеска ќе се одбележи годишнината од членството. Земјава се определи дека сака да влезе во НАТО уште во 1993 година, најблиску до членство бевме во 2008 година, но тогаш се соочивме со вето од Грција. Со Преспанскиот договор од 2017 година вратата кон Алијансата повторно се отвори
Денеска, 27 март 2023 година, Северна Македонија одбележува три години од членството во најголемиот воено-политички сојуз на светот, Северноатлантската Алијанса.
По тој повод, во касарната „Илинден“ во Скопје треба да се одржи централна церемонија на која се предвидени обраќања на премиерот Димитар Ковачевски, министерката за одбрана Славјанка Петровска и началникот на Генералштабот на Армијата генерал-потполковник Васко Ѓурчиновски.
Дел од свеченоста ќе бидат и неколку показни вежби и активности на Армијата, вклучувајќи прелет на сојузнички воздухоплови во рамки на мисијата „Air Policing“.
Во организација на Министерството за надворешни работи во Клубот на пратеници, пак, ќе се одржи традиционалниот „НАТО појадок“, со учество на дипломатскиот кор. Со ова официјално ќе започнат Деновите на НАТО во државава кои ќе траат до 4 април.
На 27 март 2020 година земјава стана 30. членка на Алијансата кога в.д. амбасадорката на Северна Македонија во САД, Вилма Петковска, на американскиот помошник-државен секретар за Европа и Евроазија, Филип Рикер, го предаде оригиналниот документ на ратификација од Пристапниот протокол за членство на земјава во НАТО.
Од Резолуција за членство, вето од Грција, преку Преспански договор до полноправно членство
Определбата за евроатлантско интегрирање датира уште од 1993 година, кога Собранието усвои Резолуција, во која се дефинирани надворешно политичките приоритети на земјата, а тоа се членството во НАТО и во ЕУ.
Во ноември 1995 г., станавме членка на Партнерството за мир (ПзМ), а во јуни следната година беше отворена и Канцеларијата за врски на Република Македонија при НАТО.
Потоа следуваше отворање на Канцеларијата за врски во 1996 година, а следната, 1997 г., државата беше примена во ПАРП процесот. Набргу потоа беше отворена и Мисијата на Република Македонија при НАТО во Брисел.
На Самитот во Вашингтон во април 1999 г., официјално станавме и земја-кандидат. Со таков статус останавме дваесетина година.
Најблиску до НАТО бевме во 2008 г., на самитот во Букурешт, но Алијансата тогаш констатира дека земјата технички е подготвена да влезе, но влезот беше попречен поради грчкото вето поради нерешениот спор за името. Откако по речиси три децении спорот беше надминат со Преспанскиот договор потпишан на 17 јуни 2018, вратата за НАТО се отвори.
По нецел месец од договорот постигнат со Грција, на Самитот на НАТО во Брисел (11-12 јули 2018 година), на состанок на ниво на шефови на држави и влади, Алијансата донесе одлука да ја покани Република Северна Македонија да ги започне пристапните разговори за членство во Алијансата.
На 1 август, 2018 година генералниот секретар на НАТО упати писмо до министерот за надворешни работи на Република Северна Македонија заедно со План за спроведување на процесот на пристапување во НАТО, а во октомври истата година, на состанок во Брисел формално беа завршени пристапните разговори. На 6 февруари 2019 г., постојаните претставници на 29-те земји членки на Алијансата во седиштето на НАТО го потпишаа пристапниот протокол за членство на Република Северна Македонија.
По овој настан започна и следната фаза во која следуваше ратификација на Пристапниот протокол во националните парламенти и институции на земјите членки на Алијансата, а беше ратификуван и во нашето Собрание.
На официјализирањето на полноправното членство што се случи на денешен ден пред две години, му претходеше потпишување на Инструментот за пристапување на Република Северна Македонија во НАТО од страна на претседателот Стево Пендаровски на 20 март 2020.