Вицепремиерот за европски прашања Бујар Османи информираше за активностите што ги презема Владата за активностите за помош во справувањето со кризата со коронавирусот.
Така, тој посочи дека е формирано координативно тело на агенциите на Обединетите нации заедно со Делегацијата на ЕУ и претставници на владиното координативно дело.
„Досега се обезбедени 25 респираторни машини преку средствата на норвешката амбасада кои ги спроведува агенцијата на обединетите нации УНОПС. Во моментот тие се во депо во Турција и разговараме за деталите како да се транспортираат во Скопје поради отежнатиот земјен транспорт“,
рече Османи посочувајќи дека се разговара да се организира транспорт заедно со другите земји од регионот.
Исто така, обезбедени се и дополнителни 30 респираторни машини од Кина кои се купуваат за 4 милиони евра и се во рамки на средствата што ѝ ги дава ЕУ на земјава за справување со коронавирусот. И за овие машини се разгледуваат опции како да се транспортираат.
Во рамки на билатералната соработка со Кина, пак, земјава ќе обезбеди уште респиратори, но која е точната бројка не се знае.
„Кина одговори позитивно на нашето барање за обезбедување респиратори, но бидејќи во моментов 100 земји бараат респиратори од Кина, ги немаат на лагер туку тековно ги обезбедуваат и затоа количината на респиратори која ќе може да се обезбеди директно во рамки на билатералната соработка не може да се каже во моментов. Меѓутоа, како што се произведуваат тие ќе бидат достапни за нашите институции“,
рече Османи.
Амбасадата на Кина во земјава, пак, годишниот фонд го пренасочина за набавка на опрема за борбата против ковид-19.