Првиот човек на Регулаторната комисија за енергетика Марко Бислимовски вчера рече дека за да ги скусат своите трошоци за струја, формирале јавни претпријатија преку кои електричната енергија за уличното осветлување ја добиваат од ЕВН, по цена за домаќинствата и со тоа за четири месеци направиле долг од 30 милиони евра што ќе предизвика поскапување на струјата за 10 отсто
Здружението на единиците на локална самоуправа од понеделник најавува средба за формирање став, по обвинувањата од власта дека општини формираат јавни претпријатија за осветлување за да плаќаат поевтина субвенционирана струја, наместо по пазарни цени, и дека тоа е причина за најавено поскапување на електричната енергија за домаќинствата од нови 10 отсто.
ЗЕЛС ќе се состане за да се разгледаат тврдењата дека на овој начин е направен долг од 30 милиони евра и струјата најверојатно поради тоа ќе поскапи 10 отсто.
Поради манипулации на дел од општините во екот на енергетската криза за набавка на електрична енергија по повластена тарифа, може да се зголемат цената на струјата за граѓаните за десет отсто, предупреди првиот човек на Регулаторната комисија за енергетика Марко Бислимоски.
За да ги скусат своите трошоци за струја, формирале јавни претпријатија преку кои електричната енергија за уличното осветлување ја добиваат од ЕВН, по цена за домаќинствата.
Со тоа велат од РКЕ, за четири месеци направиле трошок од над 30 милиони евра кој сега регулаторот бара начин како да не го вкалкулира во новата цена која ќе треба да ја плаќаат граѓаните од први јули.
Лидерот на ВМРО-ДПМНЕ, Христијан Мицкоски, не се согласува дека одговорни се општините и тврди дека имаат законски основ да формираат претпријатија.
„Законот за енергетика е јасен. Од слободниот пазар се компаниите или институциите кои што годишно остваруваат профит поголем од два милиони евра односно обрт на средства и имаат повеќе од 50 вработени. Тогаш тие по пат на автоматизам приоѓаат на слободниот пазар и таму купуваат струја. Сите компании кои што во случајот немаат обрт поголем од два милиони евра и 50 вработени се на условно кажано регулираниот пазар и ЕВН фонд ги снабдува со регулирана цена која што ја дава Регулаторната комисија за енергетика. Општините во Македонија, а тоа се неколку такви, еве ќе ви дадам пример, Штип, Охрид мислам дека и Валандово, Куманово итн. веќе имаат јавно-приватно партнерство со компанија која што има за задача да ги смени сијалиците во општината со енергетски ефикасни и на тоа право полага потоа да ги собира таксите од граѓаните во таа општина кои што граѓаните ги плаќаат преку сметките за јавно осветлување и тоа го дава оваа регулаторна комисија и тогаш обврската на општината е пренесена на тоа приватно лице… Е сега општините велат вака, бидејќи ние имавме избори во октомври-ноември, веќе во декември-јануари сите компании ни ги раскинаа договорите, нови компании не се пријавуваат а согласно закон вие морате да обезбедите електрична енергија а како ја обезбедуваат, преку снабдувачот во краен случај кој според правилникот снабдува електрична енергија по цена купец плус 50 проценти. И сега што се случува тука, тој волумен што го собира ЕВН на пари го декларира во регулаторна и регулаторна е таа кој што треба да одреди дали треба повеќе или помалку пари, а тоа е огромен волумен на пари, значи овие 250 евра плус 50 проценти, тоа 375 евра, и општините сега веќе немаат пари и викаат вака, ние имаме јавни претпријатија, тие ќе се грижат за јавното осветлување, тие се тие кои што ќе стопанисуваат а парите ние ќе ги вложиме за проекти кои што се од интерес на граѓаните тоа е улици, канализации, водоводи, реновирање на градинки, училишта бидејќи тоа не го прави државата. И тука не ги двојам општините на ВМРО, СДСМ, ДУИ, Алијанса, зборувам за сите. И сега дали е тоа исправно? Да. Дали е законски, да, дали е етички морално, да, дали е некој кој што требало да произведе, бидејќи ако оние произвеле овие 90 гигабајт часови се само еден процент, ако овие произвеле еден терават часови повеќе тогаш ние ќе немавме таков проблем. За жал тие се обидуваат да ги испљачкаат граѓаните, тоа е најголемиот проблем“,
рече Мицкоски.
За власта пак, тоа е признание дека градоначалниците од ВМРО-ДПМНЕ правеле злоупотреби со уличното осветлување.
„Со невешти оправдувања, Христијан Мицкоски денеска призна дека дел од општините раководени од ВМРО-ДПМНЕ направиле злоупотреба, формирајќи јавни претпријатија преку кои електричната енергија за улично осветлување од ЕВН ја добиваат по цена за домаќинства. Мицкоски треба да знае дека АД ЕСМ произведува електрична енергија за граѓаните и стопанството, а не за неговите градоначалници да прават малверзации со струјата на штета на граѓаните… Наместо да ги правда, ВМРО-ДПМНЕ да ги каже општините каде неговите градоначалници преку злоупотреби го прекршиле законот и на тој начин предизвикуваат поголемо покачување на цената на електричната енергија“,
реагираа од СДСМ.