Војната има големо влијание врз економиите на сојузниците на Украина, но „додека Британците бројат пени, ние броиме мртви“, порача Олена Зеленска, сопругатa на претседателот на Украина Володимир Зеленски. Во интервју за Би-Би-Си таа рече дека кризата ќе завршеше побрзо доколку поддршката беше посилна и дека е важно да продолжиме да зборуваме за човечките жртви на војната.
На прашањето, каква порака има таа за Британците кои се соочуваат со огромни сметки за енергија поради руската инвазија на Украина и влијанието што тоа го има врз глобалните цени на нафтата и гасот, Зеленска одговара:
„Разбирам дека ситуацијата е многу тешка, но дозволете ми да ве потсетам дека за време на епидемијата на kовид-19, која се уште е таму, имаше и пораст на цените и беше погодена Украина. Цените растат и во Украина. Но со тоа нашиот народ умира. Затоа знајте дека кога ќе почнете да ги броите парите на вашата банкарска сметка или во вашиот џеб, ние го правиме истото, само што ги броиме и нашите жртви“
вели Зеленска.
Зеленска рече дека е тешко за луѓето надвор од Украина да го разберат влијанието на војната врз нејзините граѓани, но затоа е важно да се споделат приказните на луѓето за жртвите од конфликтот.
Таа рече дека многу родители сигурно ќе бидат трогнати од приказната за украинското момче кое беше снимено како плаче додека ја минуваше полската граница минатиот март.
„Мислам дека татковците и мајките не можеа да го гледаат ова видео без солзи. Секогаш се ставам во нивна ситуација и мислам дека секој – секој човек на светот треба да се чувствува исто. Затоа мораме да раскажуваме вакви приказни, да ги прикажуваме овие приказни, бидејќи тие се лица на војната“
додаде Зеленска.