Лицата што се со најголем ризик од смртност од ковид-19 да останат ослободени од работа, списокот со најризичните хронични болести да биде доставен од соодветните клиники, враќањето на работа да се одвива според одредени критериуми… се дел од барањата
Комисијата за заразни болести и Министерството за здравство да објават листа на коморбидитети кои се забележани кај починатите од ковид-19 и лицата со тие дијагнози и понатаму да бидат ослободени од работа; дел од хронично болните кои се со најголем ризик од смртност од ковид-19 да останат ослободени од работа; списокот со најризичните хронични болести да биде доставен од соодветните клиники; враќањето на работа на хронично болните да се одвива според одредени критериуми бидејќи сите пациенти со хронични заболувања не се со висок ризик…
Ова се дел од барањата на повеќе здруженија на пациенти во врска со препораката на Комисијата за заразни болести за враќање на работа на хронично болните, што, како што соопштија, денеска ги доставиле до Министерството за здравство, Комисијата за заразни болести… Здруженијата денеска одржаа онлајн-состанок.
„За помалку ризичните случаи на пациенти со хронични болести да се одлучува индивидуално (односно потврдата да ја издаде специјалистот соодветно според болеста, лекувањето, работното место на кое се наоѓаат пациентите). За специјалистите да може да вршат соодветно контролни прегледи за да издадат потврда, да се обезбедат посебно термини на клиниките (пример втора смена на работа и дисперзија преку супспецијалисти и специјалисти во други градови освен Скопје). При донесување на одлуки за засегнатите пациенти, докторите специјалисти и институциите да ги контактираат соодветните здруженија за да се донесат правилни одлуки“,
стои во барањата од здруженијата на пациенти „Борка“, „Живот со предизвици“, за помош и поддршка на лицата со мултиплекс склероза, за хронична миелоична леукемија, Сојузот на здруженија на дијабетичари на Македонија, Нефрон, Хепар центар, „Пеперутка“ и Алијанса на пациентски организации – АПО.
Здруженијата изразуваат надеж дека ќе бидат земени предвид нивните предлози и бараат да се одржи состанок на претставници на здруженијата со Комисија за заразни болести и министерот за здравство Венко Филипче.