За основците и средношколците завршува зимскиот распуст и од утре се враќаат на настава во второто полугодие од учебната 2022/2023 година. Распустот беше продолжен со одлука на Владата поради заштеда на греење и здравјето на учениците, па второто полугодие наместо на 18 јануари почнува утре.
Најверојатно и учебната година ќе заврши на 14 јуни наместо на 9 јуни (петок) затоа што, како што изјави министерот за образование и наука Јетон Шаќири, учениците треба да ги одработат сите 180 работни наставни денови утврдени со Календарот за воспитно-образовниот процес во училиштата.
„За подобро функционирање на процесот, поради тоа што 18 јануари е среда, 19-ти е празник за поголем дел од граѓаните и 20-ти е петок, одлучивме второто полугодие да почне во понеделник. Исто така, да се изработат сите 180 работни денови до крајот на ова второ полугодие. Има три работни наставни денови и не гледам причина да има некаков проблем,“
рече Шаќири.
Инаку и на стартот на новото полугодие учениците се уште ги немаат добиено учебниците по сите предмети. Од МОН велат дека преостанат е минимален тираж кој согласно инфомациите од економскиот оператор кој е одбран за печатење и дистрибуција, ќе бидат испорачани во следните неколку дена.