Новата регулатива почна да се подготвува откако законот што беше донесен пролетта наиде на многу реакции во јавноста, по што и претседателот стави вето
Поминаа роковите за забелешки и увид на предлог-законот за постапување со бесправно изградени објекти. Министерот за транспорт и врски, Благој Бочварски вели дека е завршен рокот за постапката за овој закон, кој беше прикачен на ener.gov.mk.
„Сите граѓани, сите засегнати институции, невладини организации имаа можност да ги дадат своите дополнителни забелешки на овој закон. Наредните денови, во Министерството за транспорт и врски ќе ги разгледаме сите забелешки темелно и веднаш потоа ќе го доставиме законот до Влада, каде што ќе се дискутира дополнително, а веднаш потоа од Влада ќе биде доставен и до Собранието“,
изјави Бочварски, при посета на Пробиштип.
Посочи дека Владата ќе одлучи, кога и како, односно во кој формат, би бил доставен во Собранието законот за дивоградби, бидејќи, како што рече, оваа регулатива се уште е во работна верзија во Министерството за транспорт и врски и сакаат да ги вградат сите важни аспекти, кои се значајни за граѓаните. Бочварски нагласи дека ќе има можност и за дополнителна дебата меѓу пратениците во Собранието, зашто, како што рече, овој закон се носи транспарентно и во интерес на граѓаните.
Кон крајот на мај, Владата одлучи да го повлече од собраниска процедура Законот за утврдување правен статус на бесправно изградени објекти, кој предизвика низа реакции во јавноста и доби вето од претседателот Стево Пендаровски. Тогаш беше најавена подготовката на новиот закон.