Претседателот на единствената македонска партија во Албанија, Васил Стерјовски, пред неколку дена побара продолжување на попишувањето на населението во Мала Преспа и деловите каде што живее етнички македонско население бидејќи, како што рече, во последните три недели од официјалниот старт на пописот жителите во македонските краишта не се попишувале бидејќи голем дел од луѓето што живеат таму својата егзистенција ја обезбедувале со сезонска работа во соседните земји
Институтот за статистика на Албанија (ИНСТАТ) објави дека пописот на населението и домаќинствата во земјата е официјално завршен на 16 ноември. Статистичката операција почна на 18 септември и требаше да трае до 30 октомври, но потоа беше продолжена за уште 15 дена.
Во објавата на Институтот се посочува и дека до 24 месецов по слободен избор на терен ќе се изврши проверка кај лица кај кои стои забелешка оти одбиле да се попишат.
„За проценка на квалитетот на процесот и опфатот, од 20 ноември до 20 декември 2023 година ќе биде спроведена постпописна анкета според препораките на Обединетите нации и Европската Унија, во 100 пописни подрачја, распоредени низ целата земја“,
стои, меѓу другото, во соопштението на ИНСТАТ.
Дали ќе биде опфатена Општина Пустец, претставниците на македонските асоцијации во оваа земја не можеа да дадат потврден одговор, но, велат дека сè уште имаат надеж.
Поранешниот пратеник во албанското собрание и претседател на единствената македонска партија во Албанија, Васил Стерјовски, пред неколку дена изјави дека македонското население се соочило со големи притисоци од Бугарија за време на пописот, а оти дека тоа било дозволено од албанска страна.
Рече дека Бугарија правела притисок врз населението кое има аплицирано за бугарски пасоши, со цел да работи во земјите од ЕУ, а со почетокот на пребројувањето и самиот бугарски амбасадор бил во места населени со етнички Македонци за да ги убедува луѓето да се попишат како Бугари.
Стерјовски побара и дополнително продолжување на попишувањето на населението во Мала Преспа и деловите каде што живее етнички македонско население бидејќи, како што рече, во последните три недели од официјалниот старт на пописот жителите во македонските краишта не се попишувале бидејќи голем дел од луѓето кои живеат таму својата егзистенција ја обезбедувале со сезонска работа во соседните земји.
Ова е 12. попис во историјата на Албанија, а прелиминарните резултати се очекуваат во јуни следната година.
Инаку, на почетокот на пописот, пред околу еден месец, екипа на „360 степени“ го посети регионот Мала Преспа за да провери лично каков етникум доминира во овој регион и дали заканите од страна на одредени лица влијаат врз тамошното население.