Актуелната премиерка Ана Брнабиќ најави дека ќе им се обрати на граѓаните на прес-конференција закажана за 20:30 часот, додека пак од опозициската коалиција „Србија против насилството“ обвинуваат дека во Белград се нотирани голем број нерегуларности
До 19 часот, според официјални информации на ЦЕСИД/ИПСО, излезеноста е 55,9 отсто на ниво на цела држава, што е за 1,3 отсто повеќе од претходните избори во 2022 година, додека пак во главниот град Белград, каде што покрај гласањето на вонредните парламентарни избори граѓаните гласаат и за градоначалник на градот, одзивот е 51,07 отсто, што е за 3,2 отсто повеќе од минатите избори кога излезеноста беше 48,05 проценти.
Актуелната премиерка Ана Брнабиќ најави дека ќе им се обрати на граѓаните на прес-конференција закажана за 20:30 часот, додека пак од опозициската коалиција „Србија против насилството“ обвинуваат дека во Белград се нотирани голем број нерегуларности, а во Белградската арена било дозволено да гласаат луѓе од околните земји, но овој илегален обид бил спречен од страна коалицијата.
Првите официјални бројки се очекува да бидат соопштени околу 21:30 часот.
Денеска во Србија вкупно 6 500 666 запишани избирачи имаа можност да гласаат на парламентарни избори и избори за пратеници во Собранието на Војводина, како и на локалните избори во 65 општини и градови, вклучувајќи го и Белград. Гласањето на 8 273 избирачки места низ целата држава почна утринава во 7 часот и заврши во 20 часот. Претседателот на Републичката изборна комисија (РИК), Владимир Димитријевиќ, на првата прес-конференција на денот на изборите рече дека сите избирачки места се отворени навреме.
Ова се 14. парламентарни избори во Србија од воведувањето на повеќепартискиот систем, а дури деветти вонредни. На парламентарните избори во Србија учествуваат 18 изборни листи, со предложени вкупно 2 817 кандидати за 250 пратенички места. За 120-те пратенички места во Собранието на Војводина се натпреваруваат 13 избирачки листи, а за 110-те советнички места во собранието на Белград ќе се натпреваруваат 14 изборни листи.
Косовските Срби гласаа на избирачки места во јужниот дел на централна Србија – во Врање, Куршумлија, Рашка и Тутин. Лицата кои на денот на гласањето отслужуваат воен рок, воена обука или обука во единици или институции на Вооружените сили на Србија можат да гласаат на вкупно 36 избирачки места во повеќе општини.
Српските државјани кои живеат во странство можеа да гласаат во 35 земји на 81 избирачко место, а регистрирани беа 39 270 гласачи. Поради разликата во временските зони, гласањето во САД, Канада, Португалија и Велика Британија се одржа вчера.
За една изборна листа да може да влезе во Собранието и да освои пратенички мандати потребно е да го помине прагот од три проценти, а во распределбата на мандатите учествуваат и партиите и коалициите на националните малцинства и доколку освојат помалку од три проценти.