Гласачките места беа отворени во 7 часот, а право на глас на изборите за шеф на државата имаа 1 814 317, додека на парламентарните 1 815 350 граѓани кои се запишани во Избирачкиот список
Граѓаните на Македонија до 19 часот можеа да гласаат на вториот круг од седмите претседателски и на 11-те парламентарни избори. По затворањето на избирачките места, ќе можат да гласаат само лицата кои во тој момент се затекнале во објектот каде што се гласа.
Гласачките места беа отворени во 7 часот. Право на глас на изборите за шеф на државата имаа 1 814 317, а на парламентарните 1 815 350 граѓани кои се запишани во Избирачкиот список.
Тие на 3 480 избирачки места можеа да се изјаснат за еден од двајцата претседателски кандидати – Гордана Силјановска-Давкова и Стево Пендаровски, кои освоија најмногу гласови во првиот круг на 24 април.
Во вториот круг на гласање ќе биде избран кандидатот што ќе добие мнозинство од гласовите, доколку на гласачките места излезат повеќе од 40 отсто од запишаните избирачи, односно 725 727 гласачи, како што е предвидено во Изборниот законик.
Доколку во вториот круг ниту еден од двајцата кандидати не добил потребен број гласови, се повторува целата изборна постапка.
На eдинаесеттите парламентарни избори, пак, право на глас имаа 1 815 350 избирачи. За парламентарните избори се гласаше согласно пропорционалниот модел во шест изборни единици. Гласање за парламентарните избори во дијаспората нема да се спроведе бидејќи немаше доволен број пријавени наши државјани.
Избирачите можеа да гласаат со заокружување на еден од редните броеви пред седуманесетте листи на кандидатите за пратеници. Листи за кандидати за пратеници имаат Коалицијата за европска иднина предводена од СДСМ, Коалицијата Твоја Македонија на ВМРО-ДПМНЕ, Коалиција Храбро за Македонија предводена од ГРОМ, Коалиција Европски фронт на ДУИ, политичката партија Левица, Коалицијата од албанскиот опозициски блок Вреди, политичката партија Движење ЗНАМ – За наша Македонија, Единствена Македонија, Нова алтернатива Скопје, АВАЈА, Европско граѓанско движење, Македонска ера трета/Македонски независни листи – Суверенисти, Твоја партија, Родина Македонија, Десна, Демократи Скопје и Работничка партија.
Одзивот на претседателските избори до 17 часот, според дотогаш пристигнатите податоци во ДИК, изнесуваше 42,32 отсто, а на парламентарните 46,93.
Записниците и другиот изборен материјал избирачките одбори ги доставуваат до ОИК во рок од пет часа по завршувањето на гласањето. Надлежната ОИК потоа ги сумира резултатите од гласањето, составува записници и ги предава на ДИК.
ДИК првичните резултати од гласањето добиени по електронски пат ги објавува сукцесивно, а резултатите од записниците од ОИК во рок од 12 часа по завршувањето на изборите.
Конечните резултати од изборите ДИК ги објавува во рок од 24 часа од денот на нивната конечност.