Воведувањето нова маржа за трговците со горива, односно нејзино драстично намалување за 33 проценти, ќе ги принуди сопствениците да ги затворат бензинските станици во источниот дел на Македонија, велат од Здружението на брендирани и приватни бензински пумпи
Трговци најавуваат затворање на бензинските станици во источниот дел на земјата поради воведувањето нова маржа за горивата.
Воведувањето нова маржа за трговците со горива, односно нејзиното драстично намалување за 33 проценти од 4.5 на три денари, ќе ги принуди сопствениците да ги затворат бензинските станици во источниот дел на државата, велат од Здружението на брендирани и приватни бензински пумпи, кои работат во источниот дел на Македонија.
„Маржата и претходно беше навистина мала, но со сегашното намалување нашите загуби ќе бидат екстремно високи. Тие што ги носат овие одлуки треба да имаат предвид дека, иако маржата се намалува, придонесите остануваат на исто ниво, што значи дека ние и понатаму треба да исплаќаме плати како маржата да не е променета. Дополнителен проблем, што се провлекува со години, се и дивите, подвижни, бензински станици кои нелегално функционираат на паркинзи и каде што гориво се продава и купува во буриња. Поради сите овие крајно непазарни услови, ние нема да имаме избор и ќе ставиме клуч на нашите бензински станици“
вели Гоце Хубрев, претседател на Здружението.
Со реакција се јави денеска и компанијата „Макпетрол“, од каде што оценија дека намалувањето на маржата ќе предизвика криза со горивата и блокада на економијата.
„Укажуваме дека тоа може да принуди одредени трговци да престанат да продаваат гориво, а тоа е опција што и „Макпетрол“ сериозно ја разгледува“,
истакнуваат од компанијата.
Претседателот на РКЕ, Марко Бислимовски, по одлуката за намалување на трговската маржа за 33 отсто на сите трговците со нафтени деривати изјави дека тоа е единствен механизам кој на РКЕ му стои на располагање.
„Сега го активираме затоа што ова се вонредни услови и мора сите да покажат солидарност. На овој начин, во крајната цена влијаеме делумно да се амортизира огромниот пораст“,
наведе синоќа во пишана изјава Бислимовски.