Вчера Филипче имал средба со британската амбасадорка за искуствата во однос на мерките што таму се преземаат
Засега нема причина за заострување на мерките, изјави денеска министерот за здравство Венко Филипче одговарајќи на новинарско прашање дали поради вчерашната голема бројка на починати како последица на ковид-19 и присуството на британската мутација се размислува за други мерки.
„Вчера имав средба со британската амбасадорка, разменивме искуства во однос на тоа како почнал овој силен бран во Велика Британија и какви мерки презеле. Засега сметаме дека нема потреба да отстапуваме од мерките што се сега во сила“,
рече Филипче.
Тој објасни дека и понатаму се прават интензивни анализи на типот на вирусот и дека е детектирана британската мутација на вирусот.
Вчера Министерството за здравство објави дека досега лабораторијата на МАНУ открила 45 заразени со британската мутација, најмногу во Охрид и Прилеп.