Еден ден откако новиот еврокомесар за соседство и проширување Оливер Вархеји јасно порача дека носењето нов закон за јавно обвинителство треба да биде приоритет на овој парламентарен состав, и власта и опозицијата остануваат на старите меѓусебни повикувања – спротивниот политички табор да ги остави личните интереси. Според изјавите што доаѓаат од двете страни, нема никакви поместувања во преговорите, напротив, тие се во мирување и засега нема најави дека нешто ќе се промени.
Политичките партии имаат помалку од еден месец за да донесат нов закон за јавно обвинителство бидејќи Собранието треба да се распушти на 11 февруари поради предвремените парламентарни избори закажани за 12 април годинава.
Во Собранието од летото лани веќе има еден предлог-закон. Иако имаше најави дека се готви нов текст за предлог-закон поради многубројните разлики за претходниот, денеска од Министерството за правда се повикуваат токму на првичниот предлог и бараат пратениците да „најдат сила и да гласаат“.
„Законот е пуштен во Собрание и ние би биле многу среќни доколку пратениците се надминат себеси. Пораката од еврокомесарот е јасна и ние очекуваме и сакаме пратениците да најдат сила и да гласаат, мотивирани од европската иднина на државата, а не мотивирани од личните интереси на оние што сакаат да избегаат од лицето на правдата. Ова прашање е тест за патриотизмот“,
велат од Министерството.
Од СДСМ велат дека кај нив има иницијатива за носење на законот и исто како и Министерството повикуваат да се постигне договор и да се донесе законот.
Оттаму засега нема конкретни информации дека по пораките на Вархеји ќе има некакви средби и преговори со претставници од опозицијата на оваа тема.
Слично е и во ВМРО-ДПМНЕ, од каде што уште нагласуваат дека преговорите се закочени уште од октомври и ја обвинуваат власта дека нема интерес да се донесе нов закон бидејќи ја очекува неминовен пораз на изборите.
„Закон може да се донесе уште утре ако власта го прифати предлог-законот на ВМРО-ДПМНЕ. Сепак, кај СДСМ има интерес за носење закони како што е тој за марихуаната, а нема за тој за обвинителството. Одговорноста била и секогаш ќе биде кај СДСМ. Да потсетам дека Зоран Заев со предлогот за овој закон сакаше во обвинителскиот систем да ја устоличи лично Катица Јанева, обвинетата во ‘Рекет’. Разговорите на групите се кочеа намерно, а тука е и изјавата на министерката Рената Дескоска по фамозното преземање на предметите од СЈО од страна на редовното обвинителство, дека сега предметите се спасени и нема потреба да се брза со носење на законот“,
вели портпаролот на ВМРО-ДПМНЕ, Наум Стоилковски.
Носењето на законот пред да се распушти парламентот е важно бидејќи во февруари од Европската комисија ќе има мини-извештај за земјава. Тој извештај, рече вчера Вархеји, сè уште не е почнат да се пишува, но потсети дека за него е многу важен законот за јавно обвинителство.
Европската комисија ќе остане на оценката дека Северна Македонија и Албанија се подготвени за почеток на преговори, но земјава ќе испрати добра порака ако го донесе Законот за јавно обвинителство.
„Потребно е Владата и сите други институции да ги имплементираат реформите и да продолжат со досегашната работа, а секако приоритет треба да се даде на новиот закон за јавно обвинителство. Се надеваме дека тоа ќе биде направено од страна на сегашниот парламент, тоа ќе биде добра порака за нашите земји членки. По изборите, се надевам ќе имаме сигурен партнер во Владата и веќе ја изразив мојата подготвеност да работиме со кој и да ја води таа влада“,
рече еврокомесарот.
Инаку, покрај законот за јавно обвинителство, Вархеји вчера рече дека клучно е и почитување и спроведување на Преспанскиот и Договорот за добрососедство со Бугарија.