Во останатиот дел од заклочоците, лидерите на ЕУ изразуваат целосна и недвосмислена посветеност за перспективата за членство на Западен Балкан, помош од девет милијарди евра за Украина, предупредување за однесувањето на Турција…
Европската унија ја изразува својата целосна и недвосмислена посветеност на перспективата за членство во ЕУ на Западен Балкан и повикува на забрзување на процесот на пристапување. Надоврзувајќи се на ревидираната методологија, Европскиот совет ги поканува Комисијата, Високиот претставник и Советот дополнително да ја унапредат постепената интеграција меѓу Европската унија и регионот во самиот процес на проширување на реверзибилен и на начин заснован на заслуги.
Ова се наведува во заклучоците од Самитот на ЕУ објавени доцна вечерва.
Исто така, Европскиот совет констатира дека е информиран за последните случувања во дискусиите меѓу Бугарија и Северна Македонија и повикува на брзо решавање на последните преостанати прашања за да може да се отворат пристапните преговори без одлагање.
Во останатиот дел, ја потврдува итноста за постигнување опиплив напредок во решавањето на отворените билатерални и регионални спорови, особено на дијалогот Белград-Приштина за нормализација на односите меѓу Србија и Косово и го поздравува политичкиот договор постигнат на 12 јуни 2022 година од страна на лидерите на Босна и Херцеговина во Брисел, кој е потребен за стабилност и целосно функционирање на земјата и со цел да се одговори на аспирациите на народот. Ги повикува сите политички лидери во Босна и Херцеговина брзо да ги спроведат обврските наведени во договорот и итно да ги финализираат уставните и изборните реформи, кои ќе и овозможат на земјата решително да напредува на својот европски пат, во согласност со мислењето на Комисијата.
„Европскиот совет е подготвен да и додели статус на земја-кандидат на Босна и Херцеговина и за таа цел ја поканува Комисијата да поднесе извештај до Советот без одлагање за спроведувањето на 14-те клучни приоритети утврдени во неговото мислење со посебно внимание на оние кои сочинуваат значителен сет на реформи со цел Европскиот совет да се врати да одлучува по ова прашање“,
се вели во заклочоците.
Украина
Во однос на Украина, се наведува дека ЕУ ќе продолжи да дава силна поддршка за како што се наведува, економска, воена, социјална и финансиска отпорност на Украина, вклучително и хуманитарна помош. Европскиот совет нагласи дека Комисијата наскоро ќе претстави предлог за доделување на нова макрофинансиска помош до девет милијарди евра за Украина во 2022 година.
Притоа остро се осудуваат руските напади врз цивили и се бара Русија веднаш и безусловно да ги повлече сите свои војници и воена опрема од целата територија на Украина.
„Усвојувањето на шестиот пакет санкции на ЕУ дополнително го интензивира притисокот врз Русија да ја прекине војната против Украина. Ќе продолжи работата на санкциите, вклучително и за зајакнување на спроведувањето и спречување на заобиколување. Европскиот совет ги повикува сите земји да се усогласат со санкциите на ЕУ, особено земјите кандидати. Работата треба брзо да се финализира на одлуката на Советот со која ќе се додаде прекршувањето на рестриктивните мерки на Унијата на списокот на злосторства на ЕУ“,
се вели во делот за Украина при што Русија се повикува итно да го деблокира Црното Море, особено пристаништето Одеса, за да дозволи извоз на жито.
Во делот насловен како надворешни односи, Европскиот совет изразува длабока загриженост за неодамнешните како што наведуваат, повторени акции и изјави од Турција и посочува:
„Турција мора да го почитува суверенитетот и територијалниот интегритет на сите земји-членки на ЕУ. Потсетувајќи се на претходните заклучоци и на изјавата од 25 март 2021 година, Европскиот совет очекува Турција целосно да го почитува меѓународното право, да ги деескалира тензиите во интерес на регионалната стабилност во Источниот Медитеран и да ги промовира добрососедските односи на одржлив начин“,
наведуваат лидерите на ЕУ.
Тука се споменува и Белорусија, при што Европскиот совет го нагласува „демократското право на белорускиот народ да има нови, слободни и фер избори, при што ги повикуваат белоруските власти да ги поддржуваат човековите права, демократијата и владеењето на правото, но и да ја прекинат репресијата и ослободат политичките затвореници“.