Градоначалникот на Општина Гази Баба во петокот минатата недела на својот фејсбук-профил објави дека во текот на минатата седмица се случиле повеќе инциденти во автобусите на ЈСП, кои поминуваат од Ченто преку Синѓелиќ до Стајковци, во кои биле повредени ученици, деца жители на тој дел од Општината
По повод инцидентите во автобусите на Јавното сообраќајно претпријатие (ЈСП), во кои имало и повредени ученици, градоначалникот на Општина Гази Баба, Бобан Стефковски, за денеска закажа седница на Советот за превенција на кој се поканети претставници на Министерството за внатрешни работи (МВР), Собранието на С Македонија и други институции.
Седницата на Советот е закажана за во 12 часот.
Како што информираат од Општината, предвидено е градоначалникот Стефковски, кој е и претседател на Советот, да даде изјава за јавноста во врска со заклучоците од седницата.
Стефковски во петокот минатата недела на својот фејсбук-профил објави дека во текот на минатата седмица се случиле повеќе инциденти во автобусите на ЈСП во кои биле повредени ученици.
Тој поради ваквите случаи побарал зголемено полициско присуство во самите автобуси на ЈСП во критичните периоди од денот.
„Изминатите неколку денови во континуитет се случуваат инциденти во автобусите на ЈСП кои поминуваат од Ченто, преку Сингелиќ до Стајковци. Во инцидентите се повредени ученици, деца жители на тој дел од Општина Гази Баба. Како градоначалник, а воедно и претседател на Советот за превенција на Општина Гази Баба закажав седница на Советот за 19.09.2022 година (понеделник) на која се поканети претставници од Месната заедница Сингелиќ и Месната заедница Стајковци, како и претставници од надлежни институции кои по функција се членови на Советот. На таа седница ќе предложам мерки и заклучоци за надминување на состојбата. Вооедно денес одржав средба со претставници на Месната заедница Стајковци на која ги информирав за преземените дејствија од моја страна, а со цел превенција од вакви случувања во следниот период. Утрово испратив допис до Полициската станица од општа надлежност Гази Баба во кој побарав зголемено полициско присуство во критичниот период на полициски службеници во самите автобуси на ЈСП ‘Скопје’. Јавно апелирам до младите, но и нивните родители да се разговара и вакви случувања во иднина да не ни се повторуваат. Воедно апелирам и до Министерството за внатрешни работи да преземе соодветни мерки со цел расчистување на изминатите настани, но што е и најважно превенција од идни вакви и слични немили настани“,
напиша Стефковски на својот фејсбук-профил.
