Поранешната министерка за надворешни работи посочи дека досега само за Коридорот 8 меѓу Бугарија и РС Македонија во последните години се потпишани три меморандуми и уште најмалку 20 меморандуми за други области, но повеќето од нив, како што рече, останале на хартија и не се реализирани од Скопје
Поранешната министерка за надворешни работи Екатерина Захариева за време на денешната дебата во бугарското Собрание за достигнувањата на владата на Кирил Петков во преговорите со С Македонија му упати, како што рече, „пријателски совет“ да намали со ентузијазмот, објави БГНЕС
„Намалете го малку ентузијазмот, ќе ја кренете рампата многу високо и потоа ќе треба да се објаснувате“,
рече Захариева и додаде:
„Ова е пријателски совет, а не непријателски“.
Таа посочи дека досега само за Коридорот 8 меѓу Бугарија и РС Македонија во последните години се потпишани три меморандуми и уште најмалку 20 меморандуми за други области, но повеќето од нив, како што рече, останале на хартија и не се реализирани од Скопје.
За документите потпишани на владата на Петков со РСМ, Захариева нагласи:
„Да видиме што ќе следува по нив“.
Премиерот Кирил Петков се согласи дека се работи за подготовки и потпишување и дека има уште работа за подобрување на односите со РСМ.
Бугарскиот премиер Кирил Петков денеска реферира пред пратениците во Народното собранието на Бугарија за резултатите од неговата посета на Скопје минатата недела, како и од средбата на владите на двете земји што се одржа во Софија.
Ова е барање на најголемата опозициска партија Граѓани за европски развој на Бугарија (ГЕРБ), на поранешниот бугарски премиер Бојко Борисов.
Во обраќањето тој истакна дека од досегашните разговори има желба да се заврши работата.
„Димитар Ковачевски е премиер на РС Македонија една недела и четири од тие осум дена ги помина со бугарската влада“,
рече меѓудругото Петков и најави дека на 4 февруари ќе има заедничко одбележување на 150-годишнината од раѓањето на Гоце Делчев.