Премиерот повтори дека македонски јазик и македонскиот идентитет се строго заштитени
Португалското претседателство со Европската Унија во понудениот предлог за решавање на спорот меѓу Северна Македонија и Бугарија водело сметка да бидат вклучени очекувањата на двете страни, изјави денеска премиерот Зоран Заеви, по посетата на Скопје на министерот за надворешни работи на Португалија Аугусто Сантош Силва и на еврокомесарот за проширување Оливер Вархеји.
„Португалското претседателство и министерот Аугусто Силва воделе грижа да бидат вклучени очекувањата на двете страни. Рековме дека тоа е добра база и добра појдовна основа за решение. Сериозно дискутираме за предлогот, ќе продолжиме со состаноци“,
истакна премиерот.
Нагласи дека се земени предвид и бугарските позиции, но повтори дека македонски јазик и македонскиот идентитет се строго заштитени.
„Ја има опфатено и бугарската страна и согласно нивните резолуции може понатаму да се разговара, затоа што во неколку наврати реков дека очекуваме час поскоро Бугарија да го признае македонскиот јазик и идентитет. Имаме документ и јас сум изненаден што членка на ЕУ, која е од другата јужна страна на европскиот континент, која не е толку блиску до Балканот и не е толку детално упатена и навлезена, беше креативна и инвентивна за да изнајде решение, Затоа рековме дека секој пат е можно да се изнајде решение ако има добра волја од двете страни“,
истакна Заев.