Заев за идната недела најави и средба на шефицата на бугарската дипломатија и министерот за надворешни работи Бујар Османи, кои ќе треба да го договорат терминот за меѓувладина конференција на Северна Македонија и Бугарија, на која, пак, треба да се усвои акцискиот план
Потврдивме добивање избори со пријателски наратив и градење пријателство со Бугарија, рече премиерот Зоран Заев, со што ѝ одговори на бугарската министерка за надворешни работи Екатерина Захариева, која рече дека нереформирана Македонија во ЕУ ќе им служи на руските интереси, како и дека во земјава се добиваат избори со антибугарска реторика.
„Во духот на конструктивноста, секогаш комуницираме со внимателен и достоинствен дипломатски наратив и секогаш го браниме достоинството на нашиот народ. Можам да кажам дека само со пријателски наратив, со подадена рака, со политики кои и за време на кампањи и избори биле за градење на пријателство со сите соседи и со Бугарија, добивавме избори. И еве, потврдивме добивање избори на 15 јули 2020, и тоа кажува какви сме ние. Очекувам соседите да бидат пријатели, од нас можат да очекуваат само пријателство, подадена рака, ние сме градители на пријателство во регионот и немаме ниту лоши мисли ниту лоши намери кон никој од соседите, така и кон пријателска Бугарија. Верувам дека во иднина ќе правиме заеднички напори да постигнуваме договори, да градиме пакти, акциски планови, сериозни инвестициски програми, економско и какво било поврзување итн.“,
рече Заев коментирајќи ги изјавите на Захариева.
Заев денеска најави и средба на шефицата на бугарската дипломатија и министерот за надворешни работи Бујар Османи, кои ќе треба да го договорат терминот за меѓувладина конференција на Северна Македонија и Бугарија, на која, пак, треба да се усвои акцискиот план.
„Очекувам веројатно следната недела или многу брзо да се оствари средбата помеѓу нашиот министер Османи и министерката Захариева за да ја договорат меѓувладината конференција, заради тоа што овде немаме ништо спорно согласно акцискиот план, односно секторскиот план за соработка којшто е дефиниран од нашите идеи и од бугарските коишто стигнаа до нас. Очекувам на таа средба да се дефинира терминот за втората меѓувладина конференција, првата се одржа 2019 година, а потоа да бидат усвоени на влада и да влеземе во ефикасно, брзо имплементирање на сите овие определби, затоа што се добри за македонскиот народ, за бугарскиот народ, за Северна Македонија и за Бугарија и ќе бидат од помош во создавањето на севкупниот амбиент за решавањето на другите отворени прашања коишто верувам дека можеме да ги решиме час поскоро“,
изјави Заев.
Премиерот појасни дека акцискиот план е дефиниран на секторско ниво, посебна е работата на историско-образовната комисија, а посебни се политичките прашања за кои се разговара со источниот сосед. Акцискиот, односно секторскиот план, треба да биде утврден на меѓувладината конференција предводена од Османи и Захариева. Штом ќе биде утврден, како што нагласи Заев, ќе дојде како записник до владите на двете земји за да го усвојат и веднаш ќе се стартува со негова операционализација.