Премиерот Зоран Заев не очекува несогласувања со коалицискиот партнер Али Ахмети околу предлозите за технички министри кои денес ќе ги достави лидерот на ВМРО-ДПМНЕ , Христијан Мицкоски. Неколку часа пред одржувањето на лидерските средби, Заев сепак порача дека кадрите треба да се изберат внимателно.
„Верувам дека ќе бидеме сите разумни во внимателноста на предлагањето на кандидатите. Ние од СДСМ ги предложивме кандидатите , јавно ги соопштивме, тоа се познати личности кои до денеска и служеле на државата. Верувам дека нема да имаме проблеми од кадровски аспект за да правиме посебни координации и состаноци“,
изјави Заев.
Заев додаде дека нема потреба од средба со Ахмети , а по завршувањето на средбите, телефонски ќе се консултираат околу предлозите на Мицкоски.
Од ВМРО-ДПМНЕ се уште не откриваат кои се нивните фаворити за технички министер за внатрешни работи и за социјална политика. Тие денеска треба да предложат и тројца заменици-министри за финансии, земјоделие и администрација.
Вчера СДСМ одлучи да го предложи Оливер Спасовски за технички премиер. Мила Царовска ќе дојде на местото на Кочо Анѓушев како вицепремиерка за економски прашања. Дополнителни заменик-министерки во МВР и во труд и социјала, на предлог на СДСМ, ќе бидат шефиците на кабинетите на Спасовски и на Царовска – Славјанка Петровска и Санела Шкријељ.